Sorkari OROP scheme mapatong indang metetdaktsü

New Delhi, November 08 (Agencies): Honibar aonung Centre sorkari linük nung ex-servicemen lakh 24 aser rara mapang asür kinüngtsür amitsür lakh 6 atema one rank one pension (OROP) scheme mapatong sangdongogo.
Iba scheme ya ajanga sorkar senpong nungi küm shia sen crore 8,000 nungi crore 10,000 tashi intoktsü.
Iba sangdong ya taküm September 5 nü Union Defence minister, Manohar Parrikar-i metetdaktsüba den kangabo mesütep. Ajisüaka pei service mapang matongdangyongi voluntary anisüngzükertem-a iba scheme tajangzük angutsü züngokogo.
Ano külen sorkari tan nungibo pei sasa anisüngzükertem nem OROP tajangzük magütsütsü ta lemtetogo. Iba tetezü, tamalen mapang matongdangyongi mapa nungi anisüngzüker sepaitembo OROP tajangzük angutsü saka tan nungibo anojungi mapang matongdang yongi anisüngzüker sepaitemibo iba tajangzük magitettsü.
Ex-servicemen temisa parnoki maneni lungkak aittsü ta shiogo.
“Sorkari onok ashioktsüogo. Onoki iba ya magizüktettsü. Onoki maneni lungkak aittsü sentong yanglutsü atema November 9-10 nung senden ayongzüka akatsü, iba nungji linük nung aliba district 647 prongla nungi district commissioners mesüra magistrates nem medal meyiptsütsü densema lir,” ta United Front of Ex-Servicemen (UFESM) nung Group Captain, VK Gandhi (retd)-i ashi.