Sorkari Pathankot nung lendong atalokba atema Congress aitsür

New Delhi, January 05 (Agencies): Congress-i o kar jembiba nung ajemdaker Pathankot nung kiralongra mapa atalokba atema sorkari Mongulbarnü congress aitsüogo. Opposition party tongtiba, congress-i linük security atema joko mebilemer ta sorkari ashi.
January 05 anepdang tsütsü Congress otongdar Anand Sharma-i Ato Kilonser Narendra Modi dang taoba ita pa Pakistan Ato Kilonser Nawaz Sharif den ajurutepa olemtep akaba indanga asüngdanga liasü.
“Modi-i Lahore semdangtsüsa Pakistan-i pa dang kechi nangzüka lir? Pakistan den olemtep akatsüsa koba tangatetba ka agi Modi mulungjang arakzüdaktsü?” ta pai asüngdanga liasü.
Pathankot, Punjab nung aliba Indian Air Force tesep nung Honibarnü atalokba lendong nung security tenet den kiralongrar trok süogo.
Union Minister of State for Parliamentary Affairs Mukhtar Abbas Naqvi-i, “Linük rangben kiralongrartem anema külemi bendanga agüja raraba mapang congress-i o mejembitsü jembia linük anisaogo,” ta New Delhi nung osangbenertem dang ashi.
“Parnoki iba ama o jembiba ajanga linük asoshi kecha süoki ia belema maliba sayur,” ta pai shisem.
“Congress-i sepai tasütaittemi linük asoshi pei taküm bendanga agütsüba nung tasüngdangba kar asüngdanga liasü,” ta BJP lenir Abbas Naqvi-i ashi.
Pai, “Yimten meputep liaka linük security atemabo külemi angatettepa inyakdi,” ta congress dang mepishia shiogo.
Modi aser Sharif na ajurutepa jembishinüba ajak nung congress-i tasüngdangba agütsüba ajak atema External Affairs Minister Sushma Swaraj-i Parliament nung telangzüba agütsüogo, ta paisa ashi.