Sorkari petrol aser diesel litre shia nung sen 2.50 ajemer

New Delhi, Mongputeni/October 04 (Agencies): India nung nüburtem tera anisüngzüktsüsa tanü Centre sorkari petrol aser diesel totzü litre shia nung sen 2.50 ajemogo; ibaji ajanga taruba ita trok tsüngda saru nung sen crore 10,500 takoksa angutsü.
Centre sorkarisa state tem danga saru kasaji (sen 2.50) ajemtsü atema asüngdangogo, state temi yamaji inyakra totzü litre shia nung sen 5 ajemer asütsü.
Tanü New Delhi nung osangbenertem den jembidang Union Finance Minister, Arun Jaitley-i, totzü litre shia nung excise duty (saru) sen 1.50 ajemtsü aser oil marketing companies (OMCs)-ia sen 1 ajemtsü, ta metetdaktsü.
“Ni state tem danga Value Added Tax (VAT) saru nung kasa sen (sen 2.50) ajemang ta shidi zülutsü, ibaji ajanga consumer tem sen 5 ajangzüktsü,” ta pai ashi.
“Iba dak sendakba sangdong (sen 2.50 ajemba) tanü agutsütsü aser iba mapang nungjagi tenzüka sen ajemtsü,” ta pai ashi.
Taoba ita Karnataka, West Bengal, Rajasthan aser Andhra Pradesh state sorkartemibo petrol aser diesel naprong nung saru ajemogo.
Jaitley-isa, “Iba telemtetba agiba ajanga tanüngba itatem (ita trok) nung saru sen crore 10,500 shi takoksa angutsü,” ta metetdaktsü.
State sorkartemia saru ajemtsü asü? ta asüngdangba langzüdang Arun Jaitley-i, iba ya state sorkar ajak atema tetendangba ka asütsü, talisa saru ajemtsü atema takhangba agutsür lenirtem atema tetendangba mapang ka asutsü, ta ashi.
Petrol aser diesel totzü nung Centre-i excise duty saru agir aser state temi VAT saru agir, aser ajakji senteperbo totzü litre nung saru shilemji shilem 31 shi lir, ta Union Minister-isa metetdaktsü.