Sorkari Pillai indang ken o pusemtsü makok: CM Shürhozelie

Kohima, June 15 (TYO): State Police Department consultant, MKR Pillai ket nung pei mapa dak mapet senotsü aser kiojen jenti aliba ken o dak sendakba nung tanü Nagaland Chief Minister, Dr. Shürhozelie Liezietsu-i, iba ken o nung sorkari pa pu-asemtsü makok, ta metetdaktsü.
Brihostibarnü Kohima nung Kohima Municipal Council office tasen yanglutsü atema lung azüngtsüba sentong ka tembangba sülen osangbenertem den jembidang Chief Minister-i Pillai consultant mapa nungi anentsüba osang jangjatsü.
“State sorkari item ama ken o pusemtsü makok aser iba ama ken o nungbo pu-masemtsü,” ta Chief Minister-i metetdaktsü.
“Pillai shimba aser pa ket nung sen crore aika jenjang kiojen alibaji bushisüngdangtsü atema state sorkari telemtetba ka agitsü,” ta paisa metetdaktsü.
Anogo ka-ana tsüngda pa mapa nungi anentsüba order agütsütsü, ta CM-i ashi.
Iba onük nungsa CM-i, tang tashi nungbo Income Tax department-i state sorkar nem official osang agüja mali, ta ashi.
State Vigilance Commission-i bushisüngdang tenzükba dak sendakba nung pai, parnok ya nija tashi aliba tentet ka lir, aser parnok sasep nung parnok inyakyim balaka lir, ta ashi.
Nagaland sorkari MKR Pillai State Police Department consultant nungi anentsüogo.
Kochi (Kerala) nung Income Tax (IT) kübok Intelligence aser criminal investigation wing-i taoba mapang Nagaland nung Additional Superintendent of Police, MKR Pillai indang company ka ket nung sen crore 400 jenjang senotsü/kiojen aliba puteta liasü.
Pillai ya 2005 küm mapa nungi anisüngzüka liasü, saka Police modernization, Motor Transport aser state police department nung tanga nüngdaktem atema Consultant shima liasü.