Sorkari private school/college tem indang hostel mekazüktsü

APC Nagaland Y.Kikheto Sema IAS den private colleges aser schools association tir aser Empowered committee Dimapur züngsemtem Commissioner indang Rest house Dimapur nung May 11 nü tangokba noksa nung angur.

Dimapur, Monupii/May 11 (TYO): Linük kübok tesem balala nungi nüburtem aika state-i meyipa arutsü asoshi jangraba osang angazükba sülen sorkari Dimapur district-i arurtem quarantine asütsü asoshi private school aser college tem indang hostel mekazüktsü sentong yangludar.
Kidangi meyipa arurtem dak sendakba nung ken o balala sensak asemtsü asoshi Agriculture Production Commissioner, Nagaland, Y Kikheto Sema, shiba COVID-19 dak sendakba inyakyim ajak asoshi Dimapur district incharge lir, pa den Secretary, F&CS aser COVID-19, Dimapur, Core Committee Convenor, Honje Konyak nati achaayanga All Nagaland Private School Association, All Nagaland Private College Association aser DEO Dimapur den Commissioner’s Rest House, Dimapur nung May 11 nü senden ka ayongzüka menogo.
Senden nung APC-i sentepa aliba lokti dang tanga state nungi arurtem atema jenjang agibatem indang metetdaktsü. Pai, nisung aika kidangi meyipa arutsü asoshi züngoksemdar aser Dimapur kija nunga nisung 8000 dak tema asütsü, anungji sorkari renemja aliba tesem nung parnok ajakbo masemtsü, ta ashi. Anungji pai private schools aser college tem dang sorkar nem teyari agüja parnok indang hostel tem quarantine centres ama amshitsü asoshi mepeshiba den tenüngdakba tem ajak sorkari achaayangtsü ta tenangzükba agütsü.
Paisa, item nisungtem tonga aruba sülen temang kanga junga tendangtsü aser COVID-19 tashidak menar alitsü ta temulung melemi bilemba nisungtem isolation ward tem nung ayutsü, ta ashi. COVID-19 anema ajak longjemer inyaktsü asoshi yongzüka APC-i, private college hostel tem nung nisung 1500 nungi 2000 shi atema aser private school tem nung nisung 3500 nungi 4000 shi atema quarantine facilities renemtsütettsü imlar, ta metetdaktsü aser iba dak sendakba nung association tir temi telangzüba tajung agütsüogo. Association kübok maliba school aser college tem dena core committee-i tongteprateptsü asoshi telemtetba agi.
Senden nung private schools aser colleges tir anaprongla core committee nung züngsem ama shim aser lokti tentet anaprongla nungi züngsem kaka accomodation committee züngsem asütsü shimogo.