Sorkari Rajiv Gandhi Khel Abhiyan agi Khelo India melen

New Delhi, April 20 (Agencies): Narendra Modi-i aniba sorkari Rajiv Gandhi Khel Abhiyan (RGKA) agi Khelo India melenogo.

Taoba mapang Congress-i aniba UPA sorkari saisapong nung terenlok atema RGKA tenzüka liasü, ajisüaka tang BJP-i aniba sorkari taoba mapang Ato kilonser, Rajiv Gandhi tenüng intokogo.

Iba dak sentakba nung Congress-i kanga jashia, BJP sorkar tashii aruba sülen scheme balala nungi Rajiv Gandhi tenüng intokba ya tang mezüng masü, ta ashi.

Saisapong scheme nunga BJP-i politics asayar ta aitsüba dak sentakba nung Sports Minister, Sarbananda Sonowal-i, “Iba nung ya politics mali,” ta ashi.

2014 küm February ita nung Congress-i aniba United Progressive Alliance (UPA) sorkari Panchayat Yuva Krida aur Khel Abhiyan (PYKKA) agi RGKA, ta melena liasü.

Taoba sorkari Urban Sports Infrastructure Scheme aser National Sports Talent Search Scheme project tenzüka liasü, ajisüaka tan sorkari project anaprong ya Khelo India küboki aitdaktsüogo.

Congress otongdar, Tom Vadakkan-i, “Temelenshiba ka arudar aser ibaji tip shitakba tsütsülen nungi arutsüla. Parnoki scheme aser reju nüngja memelentsüi terenlok mapa nung ang rangloktsüla,” ta ashi.

Taküm General Budget nunga Rajiv Gandhi tenüng inoksema aliba schemes pezü nungi pa tenüng intokogo.