Sorkari Rajya Sabha senden nung GST Bill benok

New Delhi, August 11 (Agencies): Mongolbar nü Ato kilonser Narendra Modi-i aniba NDA sorkari Rajya Sabha senden nung Goods and Services Tax (GST) Bill benoka liasü saka opposition züngsemtemi ibaji anema sashia noktak.

Osang ajanga ashiba agi, Union Finance Minister Arun Jaitley-i GST Bill nung keta alibatemji azüngba mapang opposition MP temi pa anema yimyim ayima liasü.

Jaitley-ia opposition party aija, Congress-i linük rongsenkettsüng mindaktsüner, ta ashi.

GST Bill benokba sülen Congress-i anir opposition züngsemtemi lungkak aitba ajanga minute ishika tsüngda Rajya Sabha senden asüng tashi thinena liasü.

Goods and Services Tax Bill ajanga saru nung temelenshi kar benoker, iba nungji Central aser state saru balala densema lir. Iba nung ya sales tax, excise aser services tax densema lir saka yi aser totzü balala indangbo maden.

Tanep Congress lenir Anand Sharma-i Modi’er sorkar aija, “Senden junga katettsü atema Ato kilonseri süoki ia magir,” ta ashi.

“Parliament nung senden junga makatetba ya Ato kilonseri tekong merangba aser mezümekümba ajanga lir. Temzüng kaket pai tanaben mezülushitettsü,” ta Congress lenirisa ashi.

Sharma-i, “Opposition nung aliba mapang rongrong adokdaktsüba ajanga India ainba nokdangba atema BJP-i tatok meshitsü asü (?),” ta ashi.

Tanü opposition MP temi teka nung lisü tanak mesür sendeni arua sorkar anema yimyim ayima liasü.

Yashi Congress-i, Ato kilonser Modi ji taoba mapang IPL mendenbuba Lalit Modi den tesentaktep lir ta aija Parliament nung aser kima naprongla nung lungkak aita liasü.

Tesüiba hopta asem senden junga mekatetba atema Finance Minister Arun Jaitley-i Congress Tir aser tatong Tir Rahul Gandhi naprongla aitsüogo.

Iba ya Goods and Services Tax bill magizüktetdaktsütsü atema parnoki inyaker, ta pai ashi.