Sorkari sensosangertem kümzüka meyuteter: NPCC

Dimapur, January 17 (TYO): 2015 küm Nagaland nung shishilembar rongnungi tsümar 5 tashi tepset aser parnok rongnung asür Ritika Mehta densema liasü. La yimjak nung tepsetba den ano lar kibong tang lendongbang nung lir.
Nisung tepsetba tatalokba kar nung sorkari aitsüba osang angashiogo saka sorkari takoksa angur nembo temeten magütsür. Item lendong ajuruaka, sorkari takoksa angur nem teyari mesüra nisung tepsetertem pua merenshiba osang kecha mali, ta NPCC Tir, K Therie-i sangdong ka nung metetdaktsü.
Nagaland nung alirtem aser talisa tangar memenepba kintem tetsübu aser lendongbang ka nung alir. India Linük Temzüng nung public asoshi law & order inyakyimji kanga jangjangja shia lir aser ibaji atema state sorkar nem tashi bendanga agüja lir. State ka nung law & order maparen nung Centre sorkari teka aittsü makok aser public-i parnok taküm aser rongsen lendong nungi jenbua alitsü atema state sorkar dak teimla ayur, ta K Therie-isa sangdong nung shia lir.
Asür Ritika Mehta ji Nagaland nung ozüng akhümtsübuba nisung ka aser India senso tajung ka liasü. Lai State sorkar aser Ceasefire Monitoring Chairman dang la taküm lendong nung aliba osang aiben sangoktsüogo. Anungji Centre aser state sorkartemi la taküm lendong nung aliba meteta liasü saka parnoki la mekümzüktet.
Sorkari asür Ritika taküm lendong nungi kümzüka meyutet aser nisung tepsettsü ta meteta liaka menoktangtetba ajanga mapa shitak meinyakba jungkai adoka sayur. Ano, la tepsetba sülen ita ka süia aruaka aser CCTV kulitem liaka aibelenertem pua marutetbaji mapa shitak meinyakba dang masü saka temulung melemi bilemtsüba onük ka lir, ta NPCC Tir-isa ashi.
State aser Centre sorkartemi Nagaland nung alirtem atema süoki ia mebilemtsüba angudang kanga nemjema bilemer.
Sorkari takoksa angur nem teyari agütsütsü aser ozüng alema aibelenertem tekaratiba nung pua merenshitsü atema onoki takhangba agütsür, ta paisa metetdaktsü.

You must be logged in to post a comment Login