Sorkari tang tashi 2016 küm aluyimertem soseta asüba osang soita ayur

New Delhi, February 13 (Agencies): Linük nung aluyimertem timtem indang jungkai adoktsüba osang- Accidental Deaths and Suicide in India – 2016 (ADSI), tanü tashi sorkari magutsür.
Osang angazükba agi, 2018 küm April ita nung iba osang ya Ministry of Home Affairs (MHA) nem agutsüogo ajisüaka Ministry-i iba osang sota yua lir.
Sorkar indang osang (data) bendenba tentet National Crime Records Bureau (NCRB)-i tamalen, Accidental Deaths and Suicide in India – 2016 (ADSI) report ji 2018 küm December ita tasembuba mesüra pezübuba hopta nung sangdongtsü, ta metetdakja liasü, ajisüaka tang tashi iba osang magutsür.
2015 küm ADSI osang agutsüba sülenbo tang tashi iba osang magutsür.
Iba dak sendakba nung osangbeneri asüngdangba langzüdang Ministry of Home Affairs-i, state aika nungi agutsüba data ji shidak masü aser mabensa; NCRB-i tang tashi data ji bendendar, ta metetdaktsü.
Osang angazükba agi, state aser UT 8 nung iba data tang tashi merenem.
Iba osang menoba kuli rongnung kaji, yaküm NCRB-i states aser UTs nung crime data telemsa nung inyakyim tasen ka benokba ajanga lir. Inyakyim tasenbaji, tamalen crime heads telemsa 32 dang liasü saka tangbo IPC kübok crime heads ji 54 kümogo.
Linük ajak indang mesüaka sorkari state kar indang osangbo agutsüogo.
2017 küm July ita nung Centre sorkari Supreme Court nem agutsüba affidavit ka nung ashiba agi, 2015 küm India nung aluyimer aser alu nung aayanger 12,602 shi soseta asü, aser iba nungjagi timtiba soseta asüba state ji Maharashtra nungi aluyimer 4,291 liasü.
Tanabuba jenjang nung Karnataka nung soseta asür 1,569 liasü, tasembuba aser pezübuba jenjang nung Telangana nung aluyimer 1,400 aser Madhya Pradesh nung aluyimer 1,290 soseta asü.
Tesüiba küm ana nung linük nung aluyimertemi longkak sashia aitogo. Tawa Mumbai aser Delhi nung state balala nungi aluyimertem adenshia Swaminathan Committee Report mapa küma inyaktsü takhangba aguja liasü.