Sorkari tasüba temerenshi magientsü : Rijiju

New Delhi, July 29 (Agencies): Hokolbarnü Rajya Sabha nung sorkari, linük nung tang tatalokbatem apir sorkari tasüba temerenshi magiennür, ta ashi.
Linük nung tasüba temerenshi agientsü atema D Raja (CPI)-i benokba langzüdang Minister of State for Home, Kiren Rijiju-i, “Tang asenok aliba tensa ajanga tasüba temerenshi agientsü kuli magütsür,” ta ashi.
“Ozüngtem yanglutsü atema India linüka pei tajemdakdak lir aser iba jagi nüburtem mulungsentsü akhümtsübutsüla,” ta Kiren Rijiju-isa shisem.
Paisa ashiba agi, Linük Temzüng Arla 71, 134 aser 161 tem nung tasüba temerenshi agütsütsü atema lateta lir aser Supreme Court-ia jangjajangja, tasüba temerenshiji tensa mapang agi agizüktettsüsa aliba mapang nung amshitsüla, ta shiogo.
Paisa, lower court kati temerenshi obendang agütsür ibaji High Court-i agizük nunga nisungba jagi Supreme Court nung temepishiba benoktettsü, ta ashi.
“Iba nungji tamakok angu nunga,  nisung kati Angh aser India Tir dang mepishitettsü,” ta Rijiju-isa shisem.
Kiralongraba aser rara ayongba dak alaka tasüba temerenshi obendang magütsütsüla ta Law Commission-i benok, ta paisa metetdakja liasü.
Rijiju aser Rajya Sabha Deputy Chairman, P J Kurien napronglai Raja dang pai benokba bangzüngji agientsüla, ta ashi.
Ibaji langzüa Raja-i, “Iba ya mapa mesüra ozüng ajanga masü saka tesayuba aser tangatetba tsütsü nungi asenoki shisadangtsüla. India-i tasüba temerenshi dang ma, ta ashitsü mapang tongogo,” ta ashi.
Raja-i benokba bangzüngji ‘Voice vote’ ajanga magizük.
Senden tetenzüklen BJP züngsem, Basavaraj Patil-ia, sorkari tasüba temerenshi dak sentakba ozüngtem yanglushitsüla, ibaji meyanglushi tashi tasüba temerenshi anena atatsüla, ta jembia liasü.