Sorkari Technology amshia arrtsü akangshitsü

Nadabet (Gujarat), June 19 (Agencies): Centre-i Gujarat, Punjab, West Bengal aser Tripura nung mapatong tasen ka tenzükogo aser ibaji technological teyari ajanga arrtsü kümzüka ayutsü atema lir, ta Union Home minister, Rajnath Singh-i ashi.
“Tang tashi nung asen sepaitemi merangba ajanga asen arrtsütem kümzüka lir. Tang onoki technology amshia arrtsü akangshitsü atema mapa tenzükogo. Radar, laser, CCTV, sensor aser item mesükba ajanga arrtsü akangshir,” ta Pakistan arrtsü anasa Border Security Force (BSF) sepaitem den jembidang Rajnath-i ashi.
Iba mapatong dang ‘Comprehensive Integrated Border Management System’ ta ajar aser technology tasentiba ajanga BSF nem teyari agütsütsü.
“Onoki Gujarat, West Bengal, Punjab aser Tripura state tem nung pilot projects tenzükogo,” ta paisa shisem.
Jammu & Kashmir arrtsü nung bendangertemi arrtsü adena aittsü merangba atema asüngdangdang Rajnath-i ashiba agi, “Asen sepaitemi tesüiba mapang dang nungi tang timba kiralongrartem tepsetogo aser tesüiba küm ana tsüngda arrtsü adena aitertem kanga ajema kümogo.”