Sorkari telemtetba magienra nüburtemi longkak aittsü: Kejriwal, Mamata

New Delhi nung Delhi Chief Minister, Arvind Kejriwal aser West Bengal Chief Minister, Mamata Banerjee nati sorkar anema lokti senden nung shilem agiba noksa nung angur.

New Delhi, November 17 (Agencies): Brihostibarnü West Bengal Chief Minister, Mamata Banerjee aser Delhi Chief Minister, Arvind Kejriwal nati sorkar dang anogo asem tsüngda sen tamshidak anentsüba telemtetba agienang, mesüra nüburtemi longkak aittsü, ta metetdaktsüogo.
New Delhi nung aliba wholesale market ka nung lokti den jembidang Kejriwal-i, sen 500 aser 1000 note anentsütsü atema Ato kilonser, Narendra Modi-i telemtetba agiba nung ya miim sentong lir, aser iba ya ajanga linük tesem ajaklen timtem adokogo, ta ashi.
Paisa, tang rongdak nüngdaktem alitsü atema nübur ket nung sen mali, ta ashi.
“Iba ya ochimashi aser black money anema süra, nenok pusemer mezüngbubaji Arvind Kejriwal aser Aam Aadmi Party asütsü,” ta paisa ashi.
“Iba telemtetba ya anogo asem tsüngda agienang. Nüburtemi aremzükba matidangtsüla. Aji mesüra nüburtemi longkak aittsü,” ta Kejriwal-isa ashi.
Lokti dang Kejriwal-i, “Ni-a Income Tax commissioner ka liasü. Sen note 2000 adokba ajanga ochimashi aser black money koma nokdangtettsü,” ta asüngdang.
“India nüjiso ngur sülen iba ya ochimashi tulutiba lir,” ta paisa ashi.
“Kechiba Ambanis aser Adanis nunger mita maoer? Kechiba Swiss bank accounts alirtem mita maoer? Kechiba tanüngba India nunger tarensen nung nokdakdaktsür?” ta Delhi CM-i asüngdang.
Tanep lokti senden ka nung jembidang WB Chief Minister, Mamata Banerjee-ia, sorkar telemtetba ya ajanga linük nung rongsenkettsüng kongshiogo, ta ashi. “Parnoki (BJP) kechi jembi? Tajung anogotem arudar. Iba ya tajung anogotem asü?” ta lai asüngdang.
“Nüburtem kechi achitsü? Sentilong asü ATMs achitsü? Iba ya kechi asayamenu? Chiyungtsü, kinu tanur chiyungtsü aser mozü alitsü atema nüburtem ket nung sen mali? Aluyimertem kechi inyaktsü?” ta Mamata-i asüngdang.
Trinamool Congress lenirisa, black money nokdangtsü atema sorkari inyakba lai pusemer, saka ochimashi anema raraba nüngtem nung iba ama timtem yabo nokdangtsü, ta ashi.
“Anogo asemnü tsüngda iba telemtetba magienra onoki longkak aittsü,” ta lai ashi.
Maneni Kejriwal-i, November 8 nü sorkari iba telemtetba sangdongba sülen linük nung nisung 40 asüba ya sorkar tai ajanga lir, ta ashi. “Item nisung asüba ya shiba tai ajanga?” ta Kejriwal-i asüngdang, aser loktii ibaji langzü, “Modi! Modi!” ta ayimtena liasü.