Sorkari telemtetba magira telatet makai lungkak aittsü: SSSUD

Dimapur, Aami (June) 1 (TYO): Lisem abenba garitem nung tax sarutsü atema state sorkari department ka meshim tashi Sand Stockists & Supplies Union Dimapur (SSSUD)-i mapang telatet makai lisem abenba garitem mokdangtsü ta metetdaktsü.
SSSUD-i Aami (June) 1 nungi tax magütsütsü lemtetba sülen Rogonü (Hokolbar) anepdang nungi Dillai nung lisem abenba gari 100 dak tema anendaka lir.
Tanga ya Department of Environment, Forest & Climate Change aser Geology & Mining (G&M) Department temi truck gari shia sen 300 tax agir.
Sorkari anogo pungu tsüngda osang tejangja ka magütsüra, Union-i mapang telatet makai lisem abenba gari ajak mokdangtsü ta SSSUD general secretary, Nito Sumi-i osangbener dang ashi.
Department-i tax saruba anema Union-i menokdaker saka royalty tax ji department ka nem dang agütsütsü, ta paisa ashi.
Nagaland Rules of Executive Business 2016 nung aliba ama Nagaland nung mineral dakj sendakba mapa department nem mapa lemzükja lir, ta Dillai gate nung G&M department nungi engineer kati ashi.
Mongputeni (October) 28, 2017 nü külen senden ka amendang Forest aser G&M tsüngda ken o angatetepogo aser iba atema Rongchii (April) 2, 2018 nü chief minister lenisüba kübok PDA sorkari administrative order ka agütsü, ta paisa ashi.
Iba sülen nung department-i NMMCR 2004 nung schedule 1 kübok lateta aliba royalty agir aser money receipt agütsür, ta paisa shisem.
Ano külen, Rongchii (April) 17, 2018 nü sangdong ka nung Department of Environment, Forest & Climate Change-i Committee ka latetba shia lir.
Tax saruba ken o reprangshitsü atema tentetba luden nung Principal Secretary EF&CC (chairperson) aser PCCF, Finance, G&M, Justice & Law department nungi züngsemtem dena lir.
Iba luden jagi ita ka tsüngda osang agütsütsü aser iba mapang matong tashi lung, lisem amala dak sendakba maparen EF&CC department-i repranga atatsü ta sangdong nungsa shia lir.
Iba luden tentetbaji Chief minister-i Rongchii (April) 4, 2018 nü agizükogo ta CM Secretariat U.O ajanga ashir.