Sorkari temang anema alitsü asoshi masü, tanur mabentsü asoshi mozü agütsür

New Delhi, March 14 (Agencies): Temang anema alitsü asoshi lokti balalai tesayuba agütsüba mapang ka nung Centre sorkari tanur mabentsü asoshi tetsür nem agütsütsü ajungshir.
Lok Sabha nung asüngdangba ka langzüba mapang, ‘family planning’ sentong asoshi Centre sorkari tetsür nem tanur mabentsü atema ajem agütsütsü asoshi Union Health Minister, JP Nadda-i ashi.
Depot Medroxyprogesterone Acetate (DPMA) mozü aketba ajem ya centre indang Family Planning Programme (FPP) nung amshitsü asoshi Drug Technical Advisory Body ajanga 2016 küm September ita nung temelaba agütsü aser iba ya tetsürtem tanur mabentsü asoshi sorkari angati agütsüba mozü trokbuba lir.
Iba ajem agiba ajanga temang nung aliba teret nung timtem adokdaktsür, ta nisung temang anema alitsü asoshi inyaker teloki ashir.
Iba mozü agiba ajanga tetsür ita shilem shidak maoer, temang tuluba kümdaktsür, tekolak ngohdaktsür, mangmangdaktsür aser item mesükba timtem aika adokdaktsür, ta parnoki ashir.
DPMA ajanga nisung temang nung timtem adokdaktsüba ya tejangja zülur 2015 küm September ita nung Jan Swasthya Abhiyan, Sama, Action India, Delhi Science Forum, aser TARSHI amala doctortem aser nisung temang anepalutsü asoshi nokdaker telok balala 70-i Health Minister nem agütsü.
Tanur masotsü atema ‘sterilisation’ agütsüba mapang 2013-14 küm tetsür 162, 2014-2015 küm tetsür 140 aser 2015-2016 küm tetsür 113 asüba osang lir.
Iba sentong inyakba mapang tamakok aluba ya 2013-14 küm 3,767, 2014-15 küm 5928, aser 2015-16 küm 7960 ajurua lir.
Iba sentong agiba ajanga 2013-14 küm tetsür 437, 2014-15 küm tetsür 134 aser 2015-16 küm tetsür 78 dak timtem ajuruba osang lir.