Sorkari tesayurtem atema mebilemtsüba atema jashir: NSSATA

Dimapur, Aami (June) 9 (TYO): Sorkari inyakba nung ajemdaker onoki onok temeten atema noktaker ta Department of School Education (DoSE) dang nenshia metetdaktsür ta Nagaland Sarva Shiksha Abhiyan Teachers’ Association (NSSATA)-i ashi.
2010 aser 2013 batch SSA tesayurtem advertisement ajanga regular state employees ama shimok. Sorkari mapaji Regular State Teachers aser scale pay agütsütsü ta shia lir aser appointment order agütsüba nung Nagaland sorkari latetba ama mapang shia tesayurtem indang allowances/rates reprangshitsü ta jangjajangja shia lir ta NSSATA-isa ashi.
October 2013 nung RTI telangzüba ka nung, mapaji SSA ajanga masü saka Nagaland sorkar undertaking ajanga adokdaktsü. Tesayurtemji regular basis nung shimer aser parnok indang mapaji SSA project den co-terminus masü ta shia liasü. Anungji, onoki tang lungkak aitba ya tim dang aser onok nem temeten agüja aliba atema dang takhangba agütsür. Tang NSSATA onük ya centrally sponsored flagship programme den sendaktepba ajanga khuret mokoktettsü, ta NSSATA Agitation Committee Convenor, Thejangulie Kirha aser Secretary Arenla Tzudir nati sangdong ka nung metetdaktsü.
Sorkar tetuyuba nung ajemdaker 7th Revision of Pay (RoP) aser State non-plan budget nungi itasen agütsütsü indang takhangba agütsür. Sorkari tetuyuba ka nung mapang tesütep ka nung SSA indang Centrally Sponsored Scheme tembangdang SSA tesayurtem indang itasen Non-Plan kübok benoktsü ta shia lir. Anungji, India sorkar indang SSA scheme nung metokmeperi aliba indang jembiba jagi state sorkari memetentsür, ta NSSATA Agitation Committee-isa ashi.
Yashi State Chief Secretary, Temjen Toy-i state sorkar takhangbatem shisadanger aser khurettem koktettsü atema kanga temulung agüja meranger ta ashi. Paisa tesayurtem dang kaketshirtem indang tebilemtsü abentsü mepishiogo. Onoki akhangba onüktem atema inyakyim kar lir ta onoki angateta lir aser iba osang ya 2016 nungi onok dang shiyonga arur aser Department nem-a tetuyuba agütsüogo. Sorkari nangzükba nung ajemdaker onoki department dak temulung lema aremzüka aruogo. Ajisüaka, sorkari nangzükba ama meinyakaka onoki ‘magic formula’ ka atema takhangba magütsür. Sorkari onok shimba nung aibelen liasü ta nangzükaka, onok mapa nung shimba maparen nung taitsü kecha mali, ta NSSATA-isa ashi.
Lungkak aitba ajanga kaketshirtem tarutsü nung kongshir aser Nagaland indang education jenjang mejungi akümer ta onoki angateta lir. Ajisüaka, tesayurtemi tarutsü komala ka ajuru’ar tsüremsetabo kaketshirtem dang junga mesayutettsü, ta parnokisa metetdaktsü.
Tesayurtem timtemba atemabo mebilemtsür saka tesayurtemi lungkak ajanga education system nung tetsükdaktsü bener arutsür ta tai tongloktsüba tangatetba ya magizüker, anungji tekaratiba nung onok indang khuret agizüker inyaktsü akhanger, ta NSSATA-isa ashi.
Aami (June) 6 anogo nungi onok tesayur 2000 dak temai lungkak aitba shilem tasembuba tenzük aser sorkar nungi telangzüba tajung ka mangu tashi lungkak aitba manentsü, ta parnokisa nenshia metetdaktsü.