Sorkari ULB election atema civil society tem den olemteptsü : CM; State sorkari Naga Yimten Telok ajak den jembitsü

Chief Minister, Dr. Shurhozelie-i Nagaland Legislative Assembly nung jembiba noksa nung angur. March 24,  2017.

Kohima, March 24 (TYO) : February 1 nü Nagaland Urban Local Bodies (ULB) elections agitsü dak sendakba nung tensa mejungi akümba sülen Nagaland sorkari elections agitsü atema Naga civil society tem den olemtep alitsü sentong atonger.
State sorkar aser State Election Commission naprongi küm tetenzüklen agiba ULB election magi ama kümdaktsüogo. Ajisüaka, ULB election atema telemtetba ka agitsü atema State sorkari olemteptsü aser tangatetba lemsateptsü, ta Nagaland Chief Minister, Dr Shurhozelie Liezietsu-i tanü assembly nung ashi.
Dr Shurhozelie-isa ashiba agi, “State sorkaria aser civic elections anema nokdakba loktitentettemia Linük Temzüng kübok Arrla 371 (A) nung agüja aliba Naga nunger temeten kümzüka ayutsü atema ta shiogo. ULB election anema nokdakertemi tetsür nem shilem lemzüktsüba ajanga Arrla 371 (A) nung Naga nunger nem sobaliba temeten agüja aliba nung tetsükdaktsü bener arutsütsü ta ashir.”
Külen, State sorkari, “Linük Temzüng nung Article 243-T nung Part IX-A nung lateta aliba ama aser State Municipal Act nung ajemdaker Nagaland nung tetsür nem shilem lemzükja ULB election magira, Naga tetsür teloki benokba ken o atema Supreme Court-i Arrla 371(A) anema oshidang agütsütsü akok aser ibaji ajanga Naga nungeri timtem ajurutsü” ta shia ULB elections agitsü lemtet, ta Dr Shurhozelie-isa shisem.
Anungji, iba onük atema olemtep aser sensaksem tajung alitsü nüngdaker, ta paisa metetdaktsü.
ULBs elections onük atema Roads & Bridges Minister-ia, “lungkak aitertemi pei kin nungi nisungtem züngdokba aser kinütanur, tanur aser taintem kima nung meinzüka yutsür ki shibangja aobaji Naga nunger sobaliba aser inyakyim asü?” ta asüngdang.
“Akhümtsübua aliba Naga kin tentettemi Naga nunger lanurtem dang yi ajemtsü ajungmesoa lungkak aitba sentong nung shilem agidaktsübaji tejashitsüka lir. Iba ya Naga nunger sobaliba masü aser Khristantem aliba state ka memesük lir” ta Swu-isa ashi.
State sorkari Arrla 371(A) kümzüka ayutsü atema inyakba aibelena angatet. Arrla 371(A) nung kongshitsü ta tsübua bilemba agi tetsür nem shilem lemzüktsüba onük nembanga mayutsüla. Tetsürtemi yimtenren wadang nung shilem agitsü ajungmesotsübaji tetsür nem shilem lemzüktsüba ajanga dang akoktsü, ta paisa shisem.
Tetsür nem shilem melemzüktsübaji human rights anema inyakba ka ama züngshir. Iba onük atema asenok tsüngda temulung yirutepogo, kati ka yirutsüogo aser tejashitep adokogo. Anungji, asenoki ULB onük tanaben bener arua mejembidang, tamasa taneptsü buhitsüla, ta Swu-isa ayongzük.
ULB election anema lungkak aitba sentong nung sorkar ketdangsertem aser mapa inyaker aikati yimya balala agi yaritepogo. Sorkar mapa inyaker kati pei sorkar ka anema inyakbaji tim masü. Anungji, sorkar ketdangsertem aser mapa inyakertemi state nung tensa tajungba kümdaktsütsü atema inyakba mapa nunga yariteptsüla, ta paisa ashi.
Swu-isa taoba Chief Minister, TR Zeliang dang pelaba olen ka jembidang, sorkar aser Naga nungertem kümzüktsü atema pai Chief Minister menden toktsütsü mulungtetba atema tenüngsang agütsür, ta ashi.
TR Zeliang-i bendanga agütsüba inyakyimji Nagaland sorkar putitotsü nung züluoka ayutsü, ta Swu-isa shisem.
Tanü Assembly nungsa Dr. Shurhozelie Liezietsu-i, “tekaratiba nung Naga Yimten tebilemtsü indang telemtetba ka agitsü atema State sorkari Naga Yimten Telok ajak den olemteptsü,” ta metetdaktsü.
“Party aser sorkar ka ama, onoki tang tejembidak yimjung olemtep pusema nungiter, saka telemtetbaji ajaki agizüktettsüsa aser ajak adenba indang asütsüla” ta paisa ashi.