Sorkari yimjung nung alitsü mepishir

Dimapur, Aenjeti (January) 3 (TYO): Kiphire district kübok Sitimi nung tensa azüoka lir ta Kiphire District Administration-i osang sangoktsüogo aser tesüiba anogo ishika district administration-i Sumi aser Sangtam nunger tsüngda tesentaktep meraksatsü atema tiyongtsü nung mapa inyaka arudar, ta Home Commissioner, Abhishek Singh-i sangdong ka nung metetdaktsü.
Olulutem nokdangtsü atema social media tenokdangba agütsüogo aser social media ajanga mepetmesü mesüra meputep adoktsüsa osangtem belenshira, ozüng tapet agi merenshitsü, ta sangdong nungsa shia lir.
Sitimi nung tensa azüoka ayutsü atema Sitimi nung sepai talila lemzüktsüogo aser district administration-i Section 144 CrPC ozüng agüja lir, ta Home Commissioner-isa metetdaktsü.
Kin anaprong nungi lennirtemi yimjung nung alitsü aser tensa süngjemtsü atema mepishia metetdaktsüogo aser sorkari nisung ajak dang tensa meraksatsü aser yimjung nung alitsü mepishir, ta Abhishek Singh-isa shisem.