South Africa Hockey team senotsü tsütsü tetsükdaktsü adoker

Bhubaneswar, Yimpoksüi/November 27 (Agencies): Taruba hockey World Cup nung shilem agitsü asoshi South Africa asayartemi pei sen indoktsüsa aküm. Iba asayamung ya Rasemnü nungi tenzüktsü. World number 15 South Africa coach Mark Hopkins-i ashiba agi, South Africa nung iba asaya renloka aotsü asoshi tetsükdaktsü tulutibaji senotsü teyari mongutetba ya lir.
“South Africa nung koda nisung timbai hockey asayadir yamaji linük asoshi tajungba asütsü. Ajisüaka onok asaya balala nung shilem agitsü asoshi senotsü teyari mongutetba ya tetsükdaktsü tulu ka lir,” ta Hopkins-i PTI dang ashi.
“Asayartemi pei sen indoka World Cup nung shilem agitsü aruogo. Parnoki iba camp nung shilem agitsü aoshi sen indok. Onok asoshi tetsükdaktsü tulutibaji senotsü tsütsü lir. Tia kaa onok sponsor ishikabo lir saka iba yagi World Cup indang budget meperir.
“Onok tang sen agi meperir aser asayartemi parnok senzüsenpongba atema sen indoktsü akok,” ta paisa ashi.
Mezüngbuba asaya nung India den asayatsü lir, koba parnok asoshi kanga melarabo masütsü, saka Hopkins-i kanga temulung lema bilemer. “World Cup nung asaya ajaki kanga tongtibang. Asayamung ka takok tashi tajungtiba nung tenzüktsü merangtsüla. Onok asayamung ayongba linük den mezüngbuba asayatsü lir aser iba ya jangratemtsüka asütsü. Onok iba asaya kanga temulung lema asayatsü. Onok rongnung asaya junga asayaa akoktsüsa sempet aketba asayar tajung aika lir,’ ta pai ashi.
“Pressure ya team anaprongla atema asütsü. Asayamung ayongba linük ka ama onok dang nungi India pressure taliba asütsü. Onoki koda tajungtiba asayateter yamaji asaytsü,” ta pai shisem.