South Asia linüktem longjemtsüla: Modi

Guwahati, Feb. 06 (Agencies): Hokolbarnü Assam, Guwahati nung 12buba South Asian Games lapokba sentong nung jembidang Ato kilonser, Narendra Modi-i, saisapong ajanga south Asia linüktem telungjem ajungketettsü ta ashi.
Pai saisapongertem dang, iba sentong maongka agia akümli piyong atema tembar yimtettsüla, ta ayongzük.
“South Asia atema kü mangdangji India atema kü mangdang den kasa. Terenlok lenmang nung south Asia linüktem ajakji partners lir. Asenok, SAARC linüktem nung aliba nütsüngji alima nütsüng shilem 21 lir aser alima rongsenkettsüng shilem 9 shi lir. Tanü 12buba South Asian Games tenzüktsü asenok adenshidang, asenoki SAARC linüktem nungi saisaponger ajak tembatep, tamang aser tangatetba tajung nung northeast (India)-i aser iba yimtii anir aruogo,” ta Modi-i ashi.
Nüngtugu kentener Bhupen Hazarika-i atenba South Asian Games omen ken dak sentakba nung Modi-i, iba ken ajanga Games tanela junga ajungmesoogo, ta ashi.
Modi-isa, “Asenok koba linük nungi südir süaka, asenoki south Asia ya asen meyong ta jembir. Tembatep, tamang katetba aser tangatetba tajung ajanga saisapong, shishilembabaren aser tourism nung maongka tajung angutsü imlar,” ta ashi.
“Asen tashi metettsü asoshi iba ya SAARC linüktem atema mapang tajung ka südakjang,” ta paisa ashi.
Kasa sentong nung Assam Chief minister, Tarun Gogoi-i south Asia nung mepetmesü koktettsü atema Asian Games ya hadir tajung ka sütettsü, ta ashi.
Union Minister of State for sports & youth welfare, Sarbananda Sonowal-ia saisapong ajanga south Asia linüktem yimjiyimjung nung alitsü atema ayongzük, ta ashi.
Northeast nung iba sentong katettsüsa Gogoi aser Meghalaya chief minister, Mukul Sangma nati meranga inyakba atema Union minister-i tena nem tenüngsang agütsü.
Iba sentong nung Indian Olympic Association Tir, N Ramachandran-a dena liasü.