South Asia nung linük kati kiralongra proker: PM Modi

Hangzhou/New Delhi, September 05 (Agencies): G20 senden tanabuba anogo nung tanü Ato kilonser, Narendra Modi-i, South Asia nung linük kati kiralongra proker, ta metetdaktsü.
Hombarnü China, Hangzhou nung G20 senden tembangba anogo nung jembidang Pakistan aitsüba olen ka nung pai iba o jembi.
“Rara aser kiralongra tali züinba ajanga kasa tayongzükbatem ajurur. Linük kari ibaji linük mapatong atema hadir ka ama amshir,” ta Modi-i ashi.
“Atangji, South Asia nung linük kati tesem nung aliba linüktem nung kiralongraba agent tem prokshir,” ta Ato kilonseri ashi.
Modi-isa International linüktem dang obang ka ser longjemer kiralongra anema raratsü rongdak nüngdak ka kümogo, ta ayongzük. “Kiralongrartem senotsü agi yarirtem aser kiralongrar pusemertem nungi pilatsüla,” ta pai ashi.
Modi-isa, yimsüsüba tsütsü rongsenkettsüng nung ochimashi anema raraba, blackmoney aser saru magütsüba anema raratsüji tongtibang, ta ashi.
G20 züngsem linüktem GDP shilemji 85 lir.
G20 nung züngsem linüktemji- Argentina, Australia, Brazil, Canada, China, France, Germany, India, Indonesia, Italy, Japan, Mexico, Russia, Saudi Arabia, South Africa, South Korea, Turkey, UK, US aser European Union lir.