South Asia Satellite May 5 nü tenzüktsü

New Delhi, April 30 (Agencies): India-i South Asia linüktem nem sempet, South Asia Satellite May 5, 2017 nü agütsütsü, ta tanü Ato kilonser, Narendra Modi-i sangdong.
Iba project nung adentsü atema Pakistan linüki memelung, anungji iba project nung SAARC (South Asian Association for Regional Cooperation) linük ti nungi Pakistan dak alaka tanüngba linük tenetbo longjemogo.
“Asen kidangertem (kidanger linüktem) den amalitep alitsüla, aser asen kidanger linüktem nunga terenlok alitsüla,” ta Modi-i ashi.
“May 5 nü India-i South Asia Satellite tenzüktsü. Iba satellite ajanga iba project nung shilem agiba linüktem tajangzük angutsü,” ta paisa metetdaktsü.
Iba ya India-i sen aika jenjang sempet agütsüba lir, ta shia Modi-i, iba ya South Asia linüktem ajak amalitep ajungkettsüba mera ka lir, ta ashi.
“Iba ya onoki South Asia atema bilemja inyakba tatishitsü ka lir. South Asia satellite ajanga tesem ajungalen lenla ajak nung terenlok alitsü,” ta pai ashi.
Pai ashiba agi, iba satellite ajanga Natural resources mapping, tele-medicine, education aser IT connectivity amatem nung tajangzük angutsü.
India dak alia iba project nung shilem agiba linüktem- Nepal, Bangladesh, Bhutan, Sri Lanka, Maldives aser Afghanistan linüktem danga pai pelaba lemsatep.
South Asia Satellite ya touzük seret 2,230 lir aser iba satellite yanglutsü atema küm asem agia liasü. Iba project nung sen crore 235 intoka liasü.
Iba satellite ajanga South Asia tesem ajak ayimjemtsü. Ajisüaka iba project nung shilem agiba linüktemia parnok indang infrastructure amenoktsüsa akumtsü, aser iba atemaji India-i yaritsü melunga lir, ta metetdaktsüogo.
Iba satellite mission ya küm 12 shi atema asütsü.