South Asian Games: India-i athletics gold 11 agizükogo

12 buba SAG asayamong Athletics kübok tetsür 400 Hurdles tetoktepba nung India tsür, India tsür, Jauna Murmu (Tiyongtsü)-i gold; külem sensotsür, Ashwini Akkunji (Abelen)-i silver aser Sri Lanka tsür, Kawshalya-i bronze agizükba sülen külemi agiba noksa ka yangi angur. (Guwahati, February 11)

Guwahati, February 11 (Agencies): India’er asayartemi athletics tetoktepba nunga gold medal 11 tashi agizüka tang tasayadak 12 buba South Asian Games (SAG) asayamong nung tanü, Brehostibar nü shilem agiogo.
Suman Devi-i tetsür javelin, Rnjith Maheswary-i tebur triple jump, Om Prakash Karhana-i tebur shot put, PU Chitra-i tetsür 1500m, Ajay Kumar Saroj-i tebur 1500m, Jauna Murmu-i tetsür 400m hurdles, Dharun Ayyasamy-i tebur 400 hurdles, L Surya-i tetsür 10,000m, Srabani Nanda-i tetsür 200m aser tebur o tetsür 4×400 relay telok nati India asoshi gold agizüka liasü.
India’er asayartemi tanü silver 7 aser bronze 1 agizükba osanga jangjaogo.
Suranjaya de Silva-i tebur 200m asemteptsü tetoktepba nung alizüng mezüng tonga par Sri Lanka telok asoshi gold 1 agizüktsü.
India teloki athletics shilem nung gold 26, silver 22 aser bronze 8 tashi densema, ajak agi medal 56 tashi agizükogo.
India’er tennis asayartemia gold 2 tashi tanü India asoshi agizüktsüba osang jangjaogo.
Ramkumar Ramanathan-i külem sensopur, Saketh Myneni final asaya nung tsükdakja tebur singles gold agizükba sülen Prarthana Thombre o Sharrmadaa Baluuishika nati tetsür doubles gold tanü agizük.
India teloki tebur o tetsür singles, tebur o tetsür doubles aser mixed doubles shilem nung gold agizükba densema, ajak agi gold 5 tashi yashia agizüka liasü.
Ano külen, India’er hockey telokia goal 3-0 agi Sri Lanka telok semifinal asaya nung tsükdaktsüba sülen Pakistan den final asayatsü jenjang tanü nguogo.
Taoba mapang, 2004 küm Colombo aser 2010 küm Dhaka nung asayba SAG asayamong hockey final nung Pakistan teloki India madak takok ngua liasü.