South China Sea nung tensa junga lir: Wang

Berlin, December 19 (Agencies): Mangatettep ken o adokdak, South China Sea nung tang tensa junga aliba olen ka China Foreign Minister, Wang Yi-i tanü Honibar nü metetdaktsüogo.

“South China Sea nung tang tensa junga lir,” ta shia, iba region nung madenba linüktemi teka amoka South China Sea ken o den sentakba mangatettepbaren tamajungba mekümdaktsütsü olen ka Wang-i metetdaktsü.

China-i Vietnam, Philippines, Malaysia, Taiwan aser Brunei nunger densemba linüktem den South China Sea den sentakba mangatettep ken o benoka lir.

“Ozü linük tentetba region nung madenba linük kari iba region indang ken o indang tebilemtsü akar aser yamaji bilemtsüba atema kanga pelar. Ajisüaka, bendang linüktemi ozü ken o nung teka amoka aitba ajanga ozü region nung tensa jungdaktsütsü melena tensaji tamajungba kümdaktsür,” ta tanü Berlin semdangsang, Wang-i ashi.