South Garo Hills nung Nagmati atur ka puer ao

Tura (Meghlaya), March 01 (Agencies): Nisung puer oa sen meshiba ken o ka nung maneni nagmati atur ka Nongalbibra, Era Aning yimtsüng anasa nungi pua bener ogo.
Pua bener aosangji West Garo Hills, Chibinang nung Bholarbita yimtsüng nungi Azanur Islam lir ta jangjaogo. Pa mejangjaba nisung pongui prangpong bener pua bener ao. Aji saka tang tashi nung iba tatalokba police dang metetdakja mali.
Mejangjaba nisung pongui prangpong bener yasüng 9:30 nung Era Aning nagmati atudak nungi Islam nagmati atudak kima mejanga lia, mesor prangpong agi tuiter anir ao.
Hopta asem shi tejakdang ASAK telungpurtemi shinülong atudak tesem nungi mapa inyaker parnok 7 pua bener aoba chiokba sülen iba ya atalok.
Iba osang angashiba sülen Islam’er kinungertemi pa puer aoertem dang pa taküm tajung nung dang chioktsü akang.
Tang tashi nung kechi teloki pa pua bener aoar mejangja, saka commander in chief, Reding T Sangma-i anir ASAK telungpurtem asütsü ta temolung melemi bilemer. ASAK purtemi temalena South Garo Hills nungi nisung aika pua bener ogo. Pua bener aoertem rongnung gari anirtem, nagmati aturtem, süoshi ayokertem aser shishilembartem timba lir. Item ken o timba ka nung parnoki sen meshiba anguba sülenang puoka alirtem chioka liasü.