South Korea amaktsü nükjidong nung North Korea-i mita aoba exercise agi

Seoul, December 11 (Agencies) : North Korea nung lenir Kim Jong Un-i anir mita aoba exercise ka agibaji South Korea amaktsü nükjidong nung agiba lir, ta Deobarnü North Korea osangbenertemi ashi.
Tang ya North Korea-i timtem agütsü nungbo ta bilema South Korea kanga yakyaka mita ataba mapang ka lir.
Ajisüaka North Korea sorkar meyong KCNA osangzülurtemi North Korea sepaitem iba exercise kodang agi mesüra Hokolbarnü South Korea parliament nung parnok Tir, Park Geun-hye mapa nungi atsüzüktsü atema vote agiteptsü atema kecha meshisem.
Deobarnü North Korea osangkaket Rodong Sinmun ajanga lemsatepba osang nung iba exercise agiba noksa lir aser iba noksa nungji South Korea Tir indang Blue House amakba sayua lir.
South Korea nung Park mapa nungi atsüzüktsü atema vote sütepba mapang la dak nungi tashi ajak agiena linük Ato Kilonser nem benlokja liaka la Blue House nungsa lia atatsü aser iba mapang parliament-i la anendaktsütsü vote asübaji Constitutional Court-i asadangtsü.
North Korea-i tim masüba mapa kar tanga inyak nunga ta South Korean Ato Kilonser Hwang Kyo-ahn-i linük nung sepaitem kanga yakyaka alitsü sangdongogo
“North Korea-i onoki maginütsüsa langka tanga inyak nungbo onokia telangzüba agütsütsü aser parnoki onok amokmerenbaji onoki sashia aitsür,” ta South Korea military ketdangser kati Reuters osangbenertem dang ashi.
Telemsa adoker aliba Korea peninsula nung taküm küm kanga animesüngzüktet agi sünga lir. North Korea nungeri nuclear anaben tashi aser ballistic missile khen ta tendangogo. Parnoki nuclear tendangba ajanga UN Security Council-i kanga sashia tenük yoka nokdanger aser par linük lenir Kim-i UN den nuclear aser missile sentongtem tsütsü tangatettep kati arutsü mulunga lir.
Rodong Sinmun osangkaket nung aliba noksa nungji Kim-i iba exercise agiba binoculars agi reprangba dena lir.
“Sepaitemi peisasa raratsü renemshiba aser tsükchir tesep oa amakba repranger. Kanga junga inyakogo, tsükchirtem atsükokdak tesem malitsü,” ta Kim-i menürema ashiba KCNA-i metetdaktsü.