South Korea-i North den jembiteptsü nungnanger

Seoul, January 04 (Agencies): South Korea-i North Korea den yimjung nung alitsü senden tanaben amentsü nungnanga bilemba olen ka tanü Hombar nü metetdaktsüogo.
“Korea ana tsüngda jembiteptsü senden maneni mena ozü linük ana tsüngda tesendaktep tajungba küma yanglushitsü alizüng tulu yua lir,” ta küm tasen onük jembidang N Korea lenisang, Kim Jong Un-i tawa metetdakja lir.
Ajisüaka, Pyongyang den jembiteptsü senden maneni amentsü sentong maliba olen ka South’er Unification Ministry otongdar, Jeon Joon-hee-i tanü metetdaktsü.
“North Korea indang yimsüsütsüren melenshitsütsü nükjidong nung South Tir, Park Geun-hye-i tanaben sentaktepshitsü maparen tenzüka lir,” ta Kim-i sangoktsüba olen aitsür ta shia, Jeon-i par linük ana tsüngda tanaben lungjemshitsü senden amentsü sentong maliba olenji tanü sangoktsü.
“Korea linük ana tsüngda yimjung nung tanaben lungjemshia sentaktepshitsütsü sabang tentettsü asoshi Pyongyang ajungshir. Korea linük ana tsüngda temulung lemtep aliba ajanga dang iba alizüng ya asangsang nung ajangzüktettsü,” ta Jeon-i ajungshia ashi.
Korea linük anati yaküm December ita senden mena par linük ana tanaben sentaktepshitsü merang saka iba senden tamakok nung tembanga liasü.
“Korea linük ana tsüngda temulung lemtep maliba ajanga linük ana tsüngda tanaben sentaktepshitsü kanga saka akümer,” ta yaküm anogo 2 tashi agia senden amenba sülen South Korea Foreign Minister, Yun Byung-se-i metetdaktsü.
South-i par legislative election taküm April ita agitsü ayonga lir aser Pyongyang den sentaktepshitsü merangba ajanga iba election nung pusemer ajema akümtsü tsüboba yong Park aser lai aniba Seoul sorkari election agiba jakdang Pyongyang den jembiteptsü senden manentsü akok ta N Korea tendanger mongin, Kim Yong-hyun-ia metetdaktsüogo.
Ano külen, N Korea-i par thermonuclear tongpang osettsüset tashi tendangtsü sentong renemba osang angazükba osang ka Seoul-isa tanü metetdaktsüogo.
Nuclear tongpang osettsüset yanglutsü maparen nung tongtipangsüa nungdakba tritium oset yanglutsü nükjidong nung Pyongyang-i tzü nuclear reactor tebongba ka yangluba osang ka S Korea’er Chemical, Biological & Radiological (CBR) Defense Command-ia metetaktsüogo.