South Korea, Iran aser Italy linüktemi maotsü Health Ministry-i mepishir

New Delhi, February 26 (Agencies): Coronavirus tashidak dak sendakba nung Bodhbarnü Ministry of health & family Welfare-i sensotem dang nüngdak melira Republic of Korea, Iran aser Italy linüktemi maotsü tekümdangtsü metetdaktsüogo.
Item linük asem nungji coronavirus tashidak kanga bulua akümba osang nung ajemdaker health minister-i iba osang ya sangdonger.
Ministry-i sangdong ka ajanga, “Republic of Korea, Iran aser Italy nungi arurtem mesüra February 10, 2020 anogo nungi tenzüka bendanglen senzürtem India-i aruba sülen anogo 14 tashi sota ayutsü,” ta metetdaktsü.
February 22, 2020 nüa Ministry-i sensotem dang nüngdak melira Singapore linüki maotsü tekümdangtsü metetdakja liasü.
Ministry-isa Hombar nungi Kathmandu, Indonesia, Vietnam, aser Malaysia nungi tayimtsü ajanga India-i arurtem dak airport nung screening agitsü, ta sangdonga liasü.
Tang China, Hong Kong, Thailand, South Korea, Singapore aser Japan linüktem nungi India-i arurtem dak airport 21 nung novel coronavirus screening agidar.