South Korea nüburtemi Tir, Park anema longkak aitogo

Seoul, November 14 (Agencies): South Korea nübur meyirijang aikati par linük yimtiba, Seoul nung longkak aittsü sentong tanü Honibar nü kanga sashia agiogo.
S Korea Tir, Park Geun-hye-i mapa inyaker aser kaketshisatsü bushitsüren na den sentakba mapatong melenshitsü asoshi benokba onük magizüker ta sayutsü nükjidong nung nüburtemi tanü longkak aittsü sentongji agia liasü.
Tanü longkak aitertem Seoul yimti tiyongtsülen sentepa par longkak aittsü sentong agi tenzükba sülen parnoki Presidential Blue House tsütsüleni aotsü tenzükba yong police ketdangsertemi tzü kalokja longkak aitertemji songtemtsüsa akümba osanga jangjaogo.
Mapa inyakertem mapa nungi anentsütsü tashi tuluba shishilembatsü tentet kiburtem nem agütsütsü aser sorkari shimtetba luden kati dang high school history textbook ajunga zülua renemtsü asoshi Park-i tawa onük benok saka item onükji magizüker ta tanü longkak aitertemi metetdaktsüogo.
Ano, 2013 küm nungi tenzüka S Korea Tir menden abenla, Park-i linük lenisütsü mendena toktsütsü takhangba tanü longkak aitertemi benoka liasü.
“Sorkari tan benokba labour market mapatong magienra, onoki tarutsü mapang nung tan den tesashiba longkak aittsü renema lir,” ta Korean Confederation of Trade Union nung Tir, Han Sang-gyun-i tanü metetdaktsü.
S Korea nüburtemi tanü longkak kanga sashia aitaka, Tir Park-bo G20 senden nung shilem agitsü asoshi tang Turkey-i orr aliba osang angazükogo.