South Korea nung MERS tashidak agi shiranger 36 buba süogo

South Korea yimtiba, Seoul semdanger raliwalirtemi MERS tashidak nungi kümzüka alitsü mechi mask agi tejak meibanger senzüba noksa nung angur. (Seoul, July 10)

 Seoul, July 10 (Agencies): South Korea nung Middle East Respiratory Syndrome (MERS) tashidak agi shiranga asür nisung 36 abensaba osang tanü Hokolbar nü jangjaogo.

Ajisüaka, par linük nung MERS tashidak agi shiranger nisung tasen meputeti joko anogo 5 tashi abensaba osanga jangjaogo.

Tan tesüsa MERS tashidak agi tonga asüsangji tebokbok cancer tashidak agi shiranga Seoul yimtiba nung tentetba mozüki ka nung taneptsü bushia alir ka asüba osang jangjaogo ta S Korea Health Ministry-i metetdaktsü.

S Korea nung alir nisung 186 dak iba MERS tashidak keta aliba osang tejangja bushiteta lir aser nisung 560 dak tema dak MERS mesen keta alitsü akok ta temulung melemtetba yong parnok ajunga tangar shinga nema majurutepdaktsüi mozüki balala nung tendanga ayuba osanga jangjaogo.

MERS tashidak agi shiranger nisung 125 tashi mozükidang anepaluba sülen parnoki taneptsü ngua mozüki toktsüba osanga bushiteta lir.

Saudi Arabia semdanger arishi küm 68 tain tebur kati MERS tashidak ya menazüka par linüki tanaben meyipa aruba sülen taküm May ita 20 nü nungi tenzüka S Korea-i MERS tashidak den sentakba khuret ajurutsü tenzük.

Iba anogo nungi tenzüka taneptsü mozü mebushiteti aliba MERS tashidak ya S Korea nung alir rong nung kanga sashia menazüktepa aoba osang bushiteta lir.

Ano külen, MERS tashidak azüoktsü asoshi S Korea sorkari nungdakba maparen nendaka meinyaker ta shia, aikati S Korea sorkar aitsütsü tenzükogo.