South Korea nunger lenirtem meyipa shilangogo

Kim o Moon na Rongchii nung ajuruteptsü

Seoul, Metsüremi 06 (Agencies) : North Korea lenir, Kim Jong Un den ajurutepba sülen anogo ka lir South Korea nunger teshimtet purtem anaben kidangi meyipa shilangogo; South Korea nungertemi aibenbo North lima mesemdanger.
South Korea nungi teshimtet telok koba national security director, Chung Eui-yong-i anir ao, pa linük tonger külen indang-indanga Seoul yimti nung tir alidak tonga oor Tir Moon Jae-in den ajuruteptsü renema liasü.
Yashi Tentonü Kim den senden ka amenba mapang North o South Korea official-temi Kim o Moon na temaba jenjang nung ajurutepa senden amentsü atema kishi lapoktsü ana nung aliba lemtepogo, ta North Korea tsütsü nungia sorkar osang ka ajanga meetdaktsü.
North Korea nungeri nuclear nok-o-nü yangluba aser missile tendangba ajanga linük ana tsüngda tesendaktep raksar aliba yanglushitsü asoshi tawa tembangba Pyeongchang Olympics asayamong mapang North purtem South Korea nung aruagi shilem agiba sülen tsükchitepa aliba linük anaprongi lenmang pipoka odar.
Ano tanga osang ka ajanga ashiba agi, taruba ita nung tongpang raratsü zep ta renemer alidak arrtsü nung temaba jenjang nung senden ka amentsü atema North aser South Korea naprongi mulunga renemogo.
Pyongyang-i ashiba agi, tsükchirtem nungi par lushi kümzüka yutsütsü ta nangzükra parnoki (North Korea) nuclear nok-o-nü yangluba maparen anena ayutsü asoshi bilemdangtsü, ta tanü Sangtennü Seoul-i metetdaktsüogo.
North Korea lenir, Kim Jong Un den senden mena ken o jembiba sülen South Korea Tir, Moon Jae-in atema shimteta aliba national security adviser, Chung Eui-yong-i ashiba agi, tsükchir ket nungi North Korea lima kümzüka lir ta kuli tejangja agütsütetra, tongpang nung amshiba nuclear oset maneni yanglutsü asoshi kuli kecha mali, ta North purtemi shiogo.
Chung-isa ashiba agi, bilemba ama shidak ora taruba April ita tatemlenji Panmunjom yimdak Kim o Moon na ajuruteptsü; ibaji 1950-53 tsüngda atalokba Korea nunger rara tembangba sülenbo Korea linük ana tsüngda temaba jenjang nung senden amenba asemben buba dang asütsü.