South Korea okadaki Tir Park Geun-hye anentsür

Seoul, March 10 (Agencies) : South Korea nung Constitutional Court-i Tir Park Geun-hye menden nungi anentsüogo.
South Korea nung democratic inyakyim agi shimba Tir ka menden nungi anendaktsübaji tang mezüng asütsü.
South Korea nung ita ishika ochimashi ken o tulu ka atema nisungtemi ashishitepba aruba sülen Samsung telok nung mendenbuba tepuokdak ayutsüsa mapang ajuru. Iba sülen tanü Constitutional Court-i Tir Park Geun-hye menden nungi anentsüogo.
Tanü nungi shir anogo 60 tsüngda presidential election ka agitsü, ta linük temzüng nung lateta lir.
“Park-i Tir menden nung mapa inyaka arudang linük temzüng alema inyak aser parliament o press-i ashishitepaka, lai ochi miimbanga ayu aser ashishitepertem anema mapa inyak” ta Constitutional Court acting chief judge, Lee Jung-mi-i tanü ashi.
“Iba ken o nung la menden nungi anentsübji linük temzüng kümzüka ayutsü atema tajangzük ka lir. Onoki Tir Park Geun-hye office nungi agiener” ta Lee-i oshidang agütsü.
Ajisüaka, Park-i lai aibelena kecha meinyak ta ashir.
December 9, 2016 nü Parliament-i la menden nungi anentsütsü ta telemtetba agi nung tanü okadaki pusema nungit.
Park ya South Korea nung mezüngbuba tetsür Tir lir aser Cold War military yimsüsür, Park Chung-hee’er jala lir. Lar tsürabur anaprong tangari kahset.
Arishi küm 65 tain Park, joko Tir ka ama ‘immunity’ mali kümogo. Tang la anema ken o benoka alibatem asoshi lai okadak noktaktsüsa akümtsü.
Lar medemer Choi Soon-sil den tasa atonga süpokrem agi, tashiyim agi sen meshi aser la nem agütsüba tashi alia amshi ta Park anema ken o tem benoka lir.