South Korea pur Sudirman Cup final-i iogo

Gold Coast, May 27 (Agencies): Sudirman Cup asemben tashi koker aliba telok South Korea-i Honibarnü 3-0 agi Thailand madak takok ngua final-i iogo.
South Korean pur Deobarnü final nung China mesüra Japan den asayatsü.
Sung Ji Hyun-i asaya pezübuba nung Ratchanok Intanon 21-13, 21-17 agi koka par telok asoshi final nung asayatsü atema maongka agütsü.
Dechapol Puavaranukroh aser Sapsiree Taerattanachai nati tarep temeyoktep asaya nung 21-16, 21-12 agi Choi Solgyu aser Chae Yoo Jung ya minute 41 nung koka Thai nunger nem mezüngbuba takok agütsü.
Iba sülen tebur kicha asaya nung Son Wan Ho-i kanga junga asayaa Suppanyu Avihingsanon 18-21, 21-10, 21-17 agi akok.
“Iba hopta asayaba ajanga kü tetsüng kanga taret liasü. Ni mezüngbuba asaya nung kanga belem saka iba asaya ya akoktsüla ta ni meteta liasü. Ni pa pongubenbo kokogo saka February nung asayadangbo deciding nunga ni akok. Tanü asaya ya semi-final liasü aser ni kanga pressure nung liasü. Pa kanga dang attacking asayar ka lir anungji ni defence akangtsü aser aibelen kangabo masütsü nüngdaka liasü,” ta Son-i ashi.
Tebur tarep asaya nung Choi Solgyu aser Seo Seung Jae na ya Dechapol Puavaranukroh aser Bodin Isara an atema kanga tashi tait liasü aser Korea nung terep asayar-i 21-13, 21-16 agi akok.
Iba sülen Thai pur iba asayamong nung maneni shilem agitsü asoshi Ratchanok Intanon kaboma nung liasü, saka lai Sung mokokteti parnok iba asayamong nungi tsükadok.
“Onoki otsü tasen ka yangluogo. Taküm onok team ya tashimait ta züngshia liasü. Asayamong atongtsü mapang nung tebur tarep asayar tem team toktsü. Onoki quarter final atongtsü asoshi nükjidong ayu. Onok kanga pelar. Taoba küm ana tashi onok kanga junga asayaa arudar. Onok joko 2020 Tokyo Olympic atema asayar tasen anitettsü asoshi renemshidar,” ta South Korean head coach Kang Kyung Jin-i ashi.