South Sudan nung tayimtsü tsükok; 25 shi tsükset

South Sudan yimtiba, Juba nung khu abenba tayimtsü ka tanü Bodbar nü tsükokba sülen ketdangsertemi tayimtsü tsükokdak bushisüngdang sentong agiba noksa nung angur. (Juba, November 04)

Juba, November 04 (Agencies): South Sudan nung tayimtsü ka tanü Bodbar nü tsükoka ishiba agi nisung 25 shi tsüksetba osang ka ketdangsertemi metetdaktsüogo.
Russia-i yangluba Antonov khu abenba tayimtsüi S Sudan yimtiba, Juba nung tentetba tayimtsü anendak toktsür anüngleni meter 800 shi yimketa atuba sülen tsükok ta parnoki osang jangjashitsü.
Nile River ayongkümlen arem nung tayimtsü tsükokba ajanga tila tanurtema ishika densema ishika agi nisung 25 shi asüba osang tang tashi nung jangjaogo ta tenük kuli alir, osangbener aser sorkar ketdangsertemi osang jangjashitsü.
“Juba tayimtsü anendak toktsür Upper Nile State kübok Paloch totzü tutetdak bushia aotsü tenzükdang tayimtsüji tsükok,” ta United Nations atema osang abenba Radio Miraya-ia metetdaktsü.
Tanü tsükokba tayimtsüi nisung ishika aniba den külemi, chiyongtsüa bena aliba osang jangjaogo ta pai ashi.
Kechi timtem ajurua tayimtsüji tsükok iba osangji tang tashi mejangteta lir aser kasaji jangjashitsü asoshi tang bushisüngdang sentong tenzüka lir.
Ano, tanü tsükseta asür nisungtemji tayimtsüi aniba nisungtem kisüng asü tayimtsü tsükokdang ali nung alir nisungtema densem-ar iba osanga tang tashi mejangateti lir.