South Sudan rara nung nisung 150 asü

Juba, July 10 (Agencies) : Hokolbar nikongdang Juba yimtiba nung South Sudan army aser tesüiba mapang yimten anemer telok na raradang sepai 150 dak tema süogo, ta yimten anemertem indang otongdari metetdaktsü.
“Tasür ajak agi 150 dak tema lir, ajisüaka ano tasümang karbo angutsü amai bilemer,” ta yimten anemertem rongnung Tatong Tir Riek Machar-i ashi.
“Yashi iba rara nung presidential guard tema ajak dena liasü anungji tasübaji tang nguteta aliba dang nungi timba akümtsü,” ta Machar-i ashi.
Iba lendong ya linük nüjiso ngur küm pongububa amongtsü anogo ka lia atalok aser iba ya ajanga December, 2013 küm nungi linük nung civil war anena yimjung bener arutsü jembia aruba anokshitsür.
Tir palace nung Salva Kiir aser Machar na ajurutepdang iba rara ya ataloka mezüngbo bodyguard temi rara.
Salva Kiir ya tang army telok nung Tir lir.
Parnok ghonda tesadang ka shi kahtep aser ota otabo perangpong tila nungi tulu dena amshia kahteptsü tenzük. Juba tesem ajaklen nungi machine-gun aser artillery akahba ola angashia liasü.
Iba lendong atalokba ya kanga tia maka, ta Kiir aser Machar napronglai ashi.
Iba lendong atalokba tesem nung security aika liasü saka lenmang nung nisungtem kanga mejaja.