South Sudan sorkar tasenbai yimsüsütsü tashi benoker

Juba, April 29 (Agencies): South Sudan Tir, Salva Kiir-i mangatettep adokba yimtenren telok anaprongla nungi yimsüsürtem shima teloktep sorkar tasen tentettsüba sülen sorkar tasenbai yimsüsütsü tashi tanü, Hokolbar nü Juba yimtiba nung benokogo.
Kiir-i shimba minister 30 rong nung S Sudan sorkar anemer lenisang aliba sülen tawa S Sudan Tatong Tir akümsang, Riek Machar-i shimba yimsüsür 14 tashi densemba osang jangjaogo.
Tan teloktep sorkar tasenba tenteta yimsüsütsü tashi benokba ya Kiir aser Machar nati yaküm, 2015 küm August ita agiba yimjung tezüngzüktep asangsang nung mapa küma inyaker lir.
Election agia sorkar tasenba tentetba jakdang teloktep sorkar tasen tenteta, sorkar tasenbai acha ayanga rongsenren aser mitkar temelenshibaren agitsü aser ita 30 tsüngda nung election agitsü asoshi Kiir o Machar nati yaküm nangzüktepa liasü.
Ano, par telok ana tsüngda tongpang raradang ozüng alema inyakertem merenshitsü maparen nunga tenati amalitepa inyaktsü nangzüktepba osang angazükogo.
Kiir-i Machar Tatong Tir menden nungi anendaktsür ita 6 buba nung, 2013 küm December ita nungi tenzüka S Sudan nung telok ana tashi tenteta tongpang kanga sashia raratsü tenzük.
Aji oda, tongpang rara tensa mejungi akümba ajanga nisung meyirijang jenti asüba den külemi, nisung million 2 dak temai par S Sudan linük toktsür bendanglen jenoka alitsüsa aküm.