South Sudan Tir, Kiir-i yimjung senden jateper

Juba, July 15 (Agencies): South Sudan Tir, Salva Kiir-i yimjung senden amentsü asoshi pa anema nokdaksang, Riek Machar jaokogo.
Par S Sudan nung anogo ishika tongpang kanga sashia raraba sülen par linük nung tensa tajungba kümdaktsütsü aser taoba mapang agiba yimjung tezüngzüktep takok ngudaktsütsü nükjidong nung Kiir-i Machar senden amentsü asoshi jaokba osang jangjaogo.
“S Sudan nung tongpang raraba ajanga azü tokshiba anentsütsü mapang tongogo,” ta shia, Machar tenati tsüngdong ajurutepa senden amenba ajanga par S Sudan nung adokba mangatettepbaren bentettsütsü teimla nung par First Vice President, Machar sen senden amentsü renemba olen ka Kiir-i metetdaktsü.
Tesüiba mapang adokba mangatettepbaren agiener aroki lungjemer teloktep sorkar tentettsü renemba sülen Kiir den aroki tan July ita 8 nü osangbener den aroki ajurutep saka iba sülenbo Machar-i par linük lenisütsüren nung shilem magiba osang jangjaogo.
Kasa anogo nung Juba yimtiba aser temeket tesemtem nung Kiir aser Machar na pusemertem rong nung tongpang rara liasü aser iba anogo nung nisung 250 dak tema Juba kisüng nung asüba osang bushitetogo.
Kiir-i African Union (AU) special envoy, Alpha Oumar Konare aser cease-fire tendangtsü tentet lenisang, Festus Mogae na anisemer Machar den yimjung senden amentsü renemba osangji sangokja liasü.
Taoba mapang ama, S Sudan nung nübur o nübur na tsüngda tongpang rara, tensa mejungi mekümdaktsütsü asoshi AU aser United Nations (UN) lenirtemi S Sudan lenirtem ajungshitsü tenzüka lir.
Parnokisa ashiba agi, S Sudan nung taoba mapang tongpang kanga sashia raraba ajanga nisung million 2 dak temai pei talikdak melitettsüsa küma bendanglen jenoka aliba osang bushiteta lir.
2013 küm December ita nungi tenzüka, Kiir pusemer aser Machar pusemer na tsüngda tongpang kanga sashia rara aruba sülen alima lenirtemi ajungshia, Kiir aser Machar nati yimjung tezüngzüktep Ethiopia linük kübok Addis Ababa nung yaküm, 2015 küm August ita agi aser idangji tenati aroki lungjemer teloktep sorkar tentettsü nangzüktep.
Ajisüaka, olulu kar prokshitsü tenzükba sülen tan July ita 7 nü nungi tenzüka, Kiir aser Machar na pusemertem na tsüngda tanaben tongpang raratsü tenzüka lir.