South Sudan:Unity state nung ayawara sangdongogo

Juba (South Sudan), February 20 (Agencies) : Unity state kübok county ana nung nisung 100,000 dak tema lumisetdar, ta UN aser sorkar ketdangsertemi metetdaktsü.
South Sudan kübok county ana nung ayawara sangdongogo, ta South Sudan sorkar aser UN agency asemi metetdaktsüogo.
Parnoki ashiba agi, chiyungtsü manguba tensa ya tesem nung mapang talangka civil war manenba ajanga rongsenkettsüng kongrepa aoba agi lir.
Iba ayawara ya tesem nung küm asem tashi civil war manenba aser Tir Salva Kiir-i aniba sorkari tesem kar nung chiyungtsü magütsüi nokdangba ajanga lir, ta UN ketdangsertemi ashi.
Unity state kübok county ana senteper nisung 100,000 dak ayawara agi kongshia lir aser kobi melii South Sudan nunger nisung million ka shi ano ayawara agi atongtsü ana nung lir, ta parnokisa ashi.
“Tang nisung 100,000 kija atema bilemtsü mapang masü kechiba süra ano nisung million ka shi ayawara agi kongshitsü ana nung lir,” ta osangbenertemi ashi.
“South Sudan nung aliba kibong shi nung nisung asem rongnung ka dak ayawara agi kongshia lir,” ta osang ajangasa metetdaktsü.
“Onoki kanga tsübua aliba atalokogo,” ta South Sudan Food & Agriculture Organization nung tekolakba Serge Tissot-i ashi.
Pai, linük nung nüburtemi tsünüsembongtsü ajak tsünüteta ayongtem nungia ango peria pua chiyunga liasü, ajisüaka rara agi ali temo aliba ajak raksatsüogo. Iba ya nisungi bener aruba ayawara lir, ta ashi.
Taruba itatem nung South Sudan nunger nisung million 5.5 mesüra nütsüng yongzük shilem 50 shi chiyungtsü peria manguba agi asütsü, ta osang ajanga ashi.
Kibong asemsü lemer kasü tang chiyungtsü peria mongui timtemtepdar.
“Chiyungtsü teyari kara magütsü nungbo tanur aika lulaseta asütsü,” ta South Sudan nung UN children’s agency tekolakba Hopkins-i ashi.
Tanur 250,000 dak tema chiyungtsü peria mangur aser parnok aika yaseta asütsü ana nung lir, ta pai ashi.
South Sudan nung ayawara atongba ya tang tasen masü. 1998 küm parnok nüjiso atema raradanga ayawara agi kongshia liasü.
Iba ayawara mapang nisung 70,000 dak tema asü. Ajisüaka Hombarnü sangdongba ayawara yabo parnok sasa bener aruba lir aser iba tensa ya linük nung yimsüsürtem tai ajanga lir, ta UN ketdangser katibo metetdaktsüogo.
“Iba ayawara yabo nisungi bener aruba lir. Yimjung aser security maliba tajangzükji yaa ka asütsü,” ta South Sudan World Food Programme nung tekolakba Joyce Luma-i ashi.
South Sudan sorkari item tesem yagi chiyungtsü meyoki nokdanga ayu, ta UN ketdangser kati pa tenüng memetetdaktsüi ashi kechiba süra pa osangbenertem den jembitsü melaa mali.
Tang South Sudan nung sorkar aser lokti tentet balala tsüngda rara tiyalong lir. Anungji iba amala tesem kati teyariteper aotsüji temela masü. Lokti ajungtsü atema inyakertemi item tesem nung shibai yimsü asür ibaji mejangja aser kechi koma ang jembitsüar memetet,” ta osang ajanga ashi.
“South Sudan nunger noklang nung shilem 70 shi arem nung jenoka lir anungji item nisungtem atongtsüji kanga tasaak,” ta osangbenertemi ashi.