SP aser Congress lokteptsüa akok

Lucknow, November 08 (Agencies): Uttar Pradesh assembly election atema Samajwadi Party (SP) aser Congress na loktepba maparen tatembang kati arur ama reprangteter, kechiyong SP tongti, Mulayam Singh Yadav den senden aika mena aruba sülen Hombarnü Congress atema election sentong asameyangtsür, Prashant Kishor-i Chief Minister, Akhilesh Yadav den senden ka menogo.
Iba senden ajanga UP assembly election nung party ana lokteptsü südi ta bilemer.
Arishi küm 43 tain Chief minister Akhilesh tongti ser party ana tsüngda ticket lemsatsü, ta osang angazüker.
Election atema tasa yanglur mongin, Kishor-i Akhilesh ajura ghonda asem jungnüa senden amen, iba mapang nung tang state nung yimtenren tensa indang o lemtepogo, ta osang angazüker.
Senden tembangba sülen osangbenertem den jembidang Akhilesh-i, “Elections mapang ana nung lir, (teloktep nung) shirnoki ajangzüktsü, mesüra shirnoki takoksa angutsü, ibaji angatettsü tim. Iba telemtetbaji Party National Tiri dang agitsü,” ta ashi.
SP-i Congress den lokteptsü asü, ta asüngdangba langzüdang Akhilesh-i, “SP aser Congress nati loktepnüra, nenoki (media) ibaji nokdangtettsü asü?” ta pai ang meyiper asüngdang.
Congress atema sentong asameyangtsür Kishor-i Mulayam aser Akhilesh na ajurua senden amenba ya party ana longjemtsü atema südi ta bilemer. Tesüiba anogo trok tsüngda Kishor-i Mulayam-i anaben ajurua senden menogo.