SP-BSP alliance nungi Congress aninogo

Lucknow, Aenjeti/January 22 (Agencies): Samajwadi Party tekolakba Akhilesh Yadav-i ashiba agi, pai Congress tir Rahul Gandhi kanga akhümtsübur saka Uttar Pradesh nung BJP tsükdaktsütsü asoshi asameyang shidak akümtsü atema SP-BSP alliance nungi Congress pur aninogo.
Election tembangba sülen Congress pur den longjemer inyaktsü lenmang sadema lapoka yur Akhilesh-i ashiba agi, pa Congress den tesendaktep kangajunga lir aser taruba PM ya par state nungi adok nung kanga pelatsü.
Election tembangba sülen SP pur Congress den longjemtsü mulunga lir asü ta asüngdangba mapang Akhilesh-i ashiba agi, “onoki tangbo telangzüba magütsütettsü. Onoki election tembangba sülen telangzüba agütsütsü. Ajisüaka linük-i Ato Kilonser tasen ka aginer aser election sülen angutsü ta ni shitettsü.”
“Uttar Pradesh nungi menden ya aginra BJP pur majority masü ta reprangtettsü. BJP puri social engineering indang kanga jembir anungji ni election ongko melenshiogo aser iba telongjem ajanga inyakogo,” ta Akhilesh-i ashi.
Uttar Pradesh chief minister ama inyakdang pai terenlok mapa aika inyakaka pa 2017 küm assembly election nung tamakok angu aser pa indang election asalentong shidak masü asü.
“Anungji ni asalendong melenshia Bahujan Samaj Party aser Rashtriya Lok Dal anisem aser Congress pur atema menden ana toktsü,” ta pai ashi.
2017 UP assembly election nung Samajwadi Party aser Congress na longjem saka BJP-i parnok tsükdaktsü.
“UP nung ongko melenshia BJP tsükdaktsütsü asoshi SP-BSP teloktep party tentetogo. Onoki tangar peladaktsütsü asoshi tamakok angutsü asü,” ta pai asüngdang.
Uttar Pradesh nung SP-BSP pre-poll teloktep party nungi aginba sülen Congress puri taruba election nung Lok Sabha menden 80 prongla nungi parnok tokteptsü ta sangdongogo.
Congress pur toktsüba ajanga opposition tashi meiti akümtsü asü ta asüngdangba mapang Akhilesh-i ashiba agi, “menden asadangshiba sülen opposition pur tali tashi taitba kümshiogo. Onoki Congress pur atema menden ana toktsüogo. Onok Congress den tesendaktep kanga junga lir. Tesendaktep ken o ya balaka saka onük tongtibangtibaji BJP tsükdaktsütsüba ya lir aser ni tang iba sentong ataloktsü atema asameyangdar.”