SP-BSP teloktepji BJP atema tayongzükba ka asütsü: Amit Shah

Lucknow, Monupii/May 25 (Agencies): Tanü BJP national Tir, Amit Shah-i, Uttar Pradesh nung BSP aser SP na longjembaji 2019 küm election asoshi BJP atema tayongzükba ka asütsü, ta metetdaktsü.
Ato kilonser, Narendra Modi-i aniba sorkar küm pezü ajungba dak sendakba sentong ka nung osangbenertem den jembidang Shah-i, “BSP aser SP na longjemer toktepra ibaji onok atema tayongzükba ka asütsü. Ajisüaka onoki Amethi mesüra Rae Bareli na nungi menden ka nungbosa takok angutsü,” ta metetdaktsü.
BJP tongti, Shah-isa, parnoki Maharashtra nung Shiv Sena den teloktep meraksaner ajisüaka Shiv Sena-i teloktep raksanüra BJP-i kechi ashitsü, ta shisem.
“2019 küm Maharashtra nung BJP-i Shiv Sena den tokteptsü. Onoki parnok (Shiv Sena) NDA teloktep nungi mepiladaktsüner. Ajisüaka parnoki toktsünüra ibaji parnok melung. Tensa ajak atema onok renema dang lir,” ta pai ashi.
Shah-i ashiba agi, opposition party temi longjemtsü meranger, kechiyong 2019 küm parnoki parnok sasa NDA sorkar tamakok mengudaktsütettsü ta parnoki bilemer.
“2014 küm parnok ajaki onok anema toktep, saka onok menokdangtet. Peipei state nung parnok jenjang junga lir. Parnok longjemaka parnoki onok tamakok mengudaktsütettsü,” ta paisa ashi.
Shah-i, 2019 küm election nung BJP-i tajemba agia menden 80 nungbosa takok angutsü, ta ashi. “Onok dena maliba northeast, West Bengal, Odisha, Andhra Pradesh, Telangana, Tamil Nadu, Kerala aser tanga tesemtem nung onoki menden aika angutsü,” ta pai ashi.
BJP Tirisa, Rajasthan, Chattisgarh aser Madhya Pradesh nung Chief Minister tem memelenshitsü, ta metetdaktsüba den külemi Rajashtan nung BJP Tir tasenbaji Monupii/May 26, 2018 nü sangdongtsü, ta metetdaktsü.
Rasemnü (Bodhbar) Karnataka Chief Minister menden atema HD Kumaraswamy tenangzükba agiba sentong nung linük tesem balala nungi Opposition party aika dena opposition telongjem sayua liasü. Iba sentong nungji SP lenir, Akhilesh Yadav, BSP lenir, Mayawati, Congress lenir Sonia Gandhi aser Rahul Gandhi na, Andhra Pradesh Chief Minister N Chandrababu Naidu, RJD lenir, Tejashwi Yadav, West Bengal Chief Minister Mamata Banerjee, Communist Party of India (Marxist) lenir, Sitaram Yechury, Kerala Chief Minister Pinarayi Vijayan aser Nationalist Congress Party lenir, Sharad Pawar nunger dena liasü.