SP-i candidates tenüng sangdong

Lucknow, October 03 (Agencies): Tanü Uttar Pradesh nung SP tongti, Shivpal Yadav-i assembly menden teku atema tenüng teku sangdongba aser constituency 14 nung candidates melenba sülen mapang tatsüka tsüngda SP lenir aser Uttar Pradesh Chief Minister, Akhilesh Yadav-i, item telemtetba agibaji pai memetet, ta ashi.
Osangbenertem den jembidang Akhilesh-i, “Ni item osang kecha memetet. Tang ni iba building ya semzüktsür. Asüng nungi ni Kanpur nung terenlok mapa tenzüktsü. Tarutsü nung candidate tem melentsü,” ta ashi.
Tanep state sorkar tashi nung aliba party, Samajwadi Party (SP)-i 2017 Uttar Pradesh assembly election atema candidate teku sangdongba den külemi constituency 14 atema candidate tem melena liasü.
Congress Party nungi meyipsang, Mukesh Srivastava nem Prayagpur meden atema party ticket agütsü aser sangro zülur, Madhumita tepsetba ken o nung tepoukdak alisang Amar Mani Tripathi’er jabaso, Aman Mani Tripathi nema Nautanwa menden atema party ticket agütsüogo.
Tesülen SP tongti, Mulayam Singh Yadav’er kidang senden ka ayonga amen, aser iba senden nung Ramgopal Yadav, Shivpal Yadav aser Akhilesh nunger ajak dena liasü.
Tasüngdangba ka langzüdang Ramgopal-i, “Ticket alemba onük nung Party nung mangatettep kecha mali,” ta ashi.
Tang party ticket agütsüba candidate tem sangdongbaji Chief minister Akhilesh-i memetet ta osang prokba dak sentakba nung Ramgopal-i, “Ibaji state Tir ajanga inyak, aser iba nungi tai kecha mali,” ta ashi.