SP-i Cong nem menden 99 agütsür, saka Cong-i 120 aginer

Lucknow/New Delhi, January 21 (Agencies): Uttar Pradesh assembly election atema state Chief Minister aser Samajwadi Party (SP) tongti, Akhilesh Yadav-i Congress nem menden 99 agütsür, ajisüaka Congress-ibo menden 120 aginer.
Lucknow nung SP lenirten aser Congress lenir, Ghulam Nabi Azaad den Priyanka Gandhi Vadra atema inyaktsür ka densema senden amenba sülen Akhilesh-i iba osang metetdaktsü.
Ajisüaka Congress-i menden 99 ji agizüker asü magizük’ar iba osangji Congress-ibo memetetdaktsü.
Ano külen Uttar Pradesh SP unit tongti, Naresh Agrawal-i, state nung SP aser Congress na melokteptettsüa akok ta jembibaji tai, ta Congress lenir tain, Raj Babbar-ibo shiogo.
Agarwal-i, “Iba teloktep teraksar. UP chief minister (Akhilesh Yadav)-i Congress nem menden 100 agütsür, saka parnoki (Congress) menden 120 dang nungi tajemba maginer,” ta osangbenertem dang metetdakja liasü.
Ano külen UP PCC tongti, Raj Babbar-i, teloktep atema jembiba nung tetsükdaktsü kecha mali, ta ashi.
Congress lenir tain, Ghulam Nabi Azad-ia, Congress-SP teloktep osangji Deobar anepdang jangjatsü, ta ashi.
SP-i candidates 210 sangdongogo, aser iba nungji Congress indang menden 9 lir.
SP lenir aser Akhilesh tebu, Mulayam Singh Yadav-i Congress Party den meloktepdaktsüner saka SP nung telok katibo Muslim nunger vote melemsatsü atema loktepner.
Tanep sangdong ka ajanga, Deobarnü Akhilesh-i party manifesto sayatsü, ta metetdaktsüogo, ajisüaka tamalenbo iba sentongji Congress aser SP naprong külemi agitsü ta jembia liasü.
BJP state Tir, Keshav Prasad Maurya-i Congress-SP loktepaka meloktepaka ibaji ajanga UP election nung BJP jenjang meraksatsü, ta shiogo.
17buba Uttar Pradesh Legislative Assembly election February 11 nü nungi March 8, 2017 tashi nung shilem tenet lemsar agitsü.