SP-i secular teloktep toktsüogo

Lucknow, Sept 03 (Agencies): Bihar Assembly election agitsü mapang ana nung lia tanü Samajwadi Party (SP)-i BJP anema secular teloktep toktsüogo, aser parnoki Bihar election nung shinga den-a meloktepi tokteptsü.

Tanü Lucknow nung osangbenertem den jembidang Samajwadi Party general secretary Ram Gopal Yadav-i, “Bihar nung party kijai tokteptsü. Iba teloktep nung party tulutemi onok den mangatettepi menden alemba osang sangdongogo, ibaji SP mezüngshiba ka lir,” ta ashi.

Secular teloktep toktsütsü asoshi telemtetba ya SP parliamentary board senden nung agia liasü. Iba senden nung party tongti lenir Mulayam Singh Yadav-a densema liasü.

Tamalen Mulayam-i Nitish Kumar aser RJD tongti lenir Lalu Prasad na tsüngda yimjung yangluja longjemdaktsü aser Bihar Chief Minister candidate Kumar asütsü atema-a pai Lalu mesüzüka liasü.

Election agitsü joko ita ishika dang lia JD(U)-RJD-Congress senteper imlaa aliba secular vote nung telemsa adoktsüa akok.

Ajisüaka JD(U) Tir Sharad Yadav-ibo Samajwadi Party telung nung mangatettep alibaji bentettsü aser teloktep nung mekongshitsü, ta shiogo.

Iba ya ajanga Janata Parivar teloktep nunga kongshitsüa akok. Iba teloktep nung party tem-SP, RJD, JD(U), JD(S), INLD aser Samajwadi Janata Party-i taküm April nung parnok longjemba osang sangdonga liasü, iba mapang nungjisa parnoki, Bihar election sülen teloktepji jungjunga tentettsü ta sangdonga lir.

SP lenir Yadav-i, menden alemdang secular teloktep nung party tulutemi SP den-a jembitsüla, ta ashi.

“Iba osang ya onoki media ajanga metet aser SP mezüngshiba sayur,” ta pai ashi.

Iba dak sentakba nung JD(U) Tir Sharad Yadav-i Mulayam den jembiogo, aser telemtetba tajung ka dangi arutsü imlaba olen pai jembiogo.

Tanü Ram Gopal Yadav-i SP-i secular teloktep toktsüba osang sangdongba sülen ghonda ishika tsüngda Yadav-i Delhi nung osangbenertem dang, “Küna ya mapang talangka nungi külemi inyaksema arur. Ni adianu Mulayam den jembitsüla. Ni pa den jembiogo. Ni ano pa den jembitsü. Tatemsabo onoki ya junga latettsü,” ta ashi.