SP longjema alitsü: Mulayam Yadav

Lucknow, January 11 (Agencies): Samajwadi Party telung nung mepetmesü aliba mapang ka nung tanü party lenir, Mulayam Singh Yadav Lucknow nung aliba party headquarters-i oa party nung inyakertem dang longjema alitsü mepishiogo.
Party nung inyakertem den jembidang Mulayam-i, Samajwadi Party yangertsü atema nisung aikati kanga meranga inyakogo, ta ashi.
“Timtem aika ajangshiba sülen ang Samajwadi Party ya yangertet. Party nung inyakertemi tetsükdaktsü aika ajuruogo. Emergency mapang ni jail nung alidang Akhilesh Yadav (par jabaso aser Uttar Pradesh Chief Minister) arishi küm 2 ser ita pongu dang liasü,” ta Mulayam-i ashi.
Sabang nung pa den teno tanubosang, Shivpal Yadav-a liasü.
“Kü ket nung kechisa ali, ibaji linük atema lir. Iba den kü ket nung kechisa lir? Nenok lir,” ta pai party nung inyakertem dang ashi.
Party nung mepetmesü aliba dak sentakba nung pai, “Party telungjem nung shingaia tetsükdaktsü madokdaktsütsü atema ni Delhi-i ao, iba atemaji ni mapang agutsütet. Party raksatsütsü atema shibai inyaker’ar ni meteta lir,” ta ashi.
Party Chief Minister candidate atema ni Akhilesh Yadav shimogo, anungji party lungjema alitsü atema iba onük tembangtsüla ta shia Mulayam-i, “Ni Akhilesh dang, ‘kechiba na Ram Gopal Yadav sang nung ashih’ ta asüngdang,” ta ashi.
Samajwadi Party longjema alitsü ta ni tamang tulu lir ta shia Mulayam-i, “Party longjema alitsü atema nüburtem aser party nung inyakertemi inyaktsü. Party nüngja mesüra maitsü memelenshitsü. Kü ‘cycle’ ji kü densa alitsü,” ta ashi.