SP nung tsükchitep ajanga BJP ajangzüktsü: Rita Bahugana

New Delhi, Oct. 22 (Agencies): Honibarnü BJP züngsem tasen, Rita Bahuguna Joshi-i, Samajwadi Party (SP) nung Yadav’er kibong tsüngda tsükchitepba ajanga 2017 Uttar Pradesh Assembly election nung BJP ajangzüktsü, kechiyong tang Centre nung BJP sorkar tashi nung lir aser Ato kilonser, Narendra Modi tarak meketi lir, ta ashi.
“SP jenjang ano tamajungba akumtsü, koba ajanga BJP dang ajangzüktsü, kechiyong nüburtemi pei jenjang ajungtsü atema bilemer aser parnoki National party tem nung rangloker,” ta laisa ashi.
“UP nung Congress jenjang mejungi kümogo, ajisüaka tang Centre nung BJP-i yimsü tesükdak lir aser Ato kilonser tenüng menük kecha mali, iba den külemi UP nung ozü minister tem junga amenokogo. Ibayongji state nung BJP-i majority ngua sorkar akumtsüji takoktsü lir,” ta  lai New Delhi nung osangbenertem dang ashi.