Space Application Center training agi

Dimapur, May 6 (TYO): North East region aser Andhra Pradesh nung aliba space application center tem atema anogo 6 nü NGISRSC UAV-RS training sentong agiba May 6, 2017 nü tembangogo.
Iba sentong ya North Eastern Region (NER) nung state tem atema ‘Use of Unmanned Aerial Vehicle Remote Sensing (UAV-RS)’ kübok NGISRSC, Kohima Nagaland nung May 1 nungi 6, 2017 tashi agi.
Sentongji North Eastern Space Application Centre (NESAC) aser Nagaland GIS & Remote Sensing Centre (NGISRSC) yaritepa agi.
North Eastern state tem nung aliba remote sensing & space application center tem nung UAV infrastructure renloktsü nükjidong nung iba sentong ayongzük.
May 6, 2017 nü Chief Secretary indang Conference Hall nung training tembangba sentong nung, NESAC Director, PLN Raju-i UAVs-i inyakba osangtem metetdaktsü.
“UAVs ya security aser tsünüsenbongba, anentsüh timtem aser tanga onük aika nung amshitettsü. Nür kidang mener, nai item applications ketdangsüa amshitsü akok” ta pai ashi.
Linük kübok tanga tesemtem nungi North East region nung UAV tali renloka aoer aser iba asoshi tenüngsang agütsür. Maneni NESAC-i nüngdakba mapangtem nung state tem yaritsü, ta Raju-isa shisem.
Tanü agiba sentong nung Nagaland Chief Secretary, Pankaj Kumar-ia UAV technology amshitsü nüngdakba aser technology ainba den külemi anidaktsü atema tayongzükba agütsü.
Paisa, state balala nungi adenshirtem dang state o state tsüngda technology tsütsü lemsateptsü aser ibaji ajanga North Eastern state ajak renloktsü, ta mepishia metetdaktsü.
Iba training nung Andhra Pradesh dena North Eastern state ajak nungi officers/engineers/scientists 20 aden.
Tanü agiba sentong nung mendenji Project Director, NGISRSC, Er. Mhathung Kithan liasü aser Training Instructor, NGISRSC, Er. Atho-o-i training agiba osang tatsü agi metetdaktsü.