Spain morok-mi lendong nung nisung 11 asü, 19 samar bushir

Madrid, Chiteni/July 10 (Agencies): Spain south tsütsü Almeria nung morok-mi adokba lendong nung nisung 11 asü aser 19 samar bushir, kong Hokulbarnü firefighter temi linük puti otsü nung tesashitiba mi remseptsü meranger.

Ketdangsür temi ashiba agi, asürtem ya timba bendanger amai lir, shirnoki tesem balala nung jenoka alitsü totuyuba agütsüba senzüka yutsü.

Mi ya Almeria province kübok Los Gallardos jila temeket nung aliba süngnü nung kanga kera jangroyonga ao aser anasa Bedar hamlet nung tali kongshi, ta Andalusia region nung head of emergencies Antonio Sanz-i ashi.

Ketdangsür temi nüburtem dang pei ki telung nung alitsü ashi aser asürtem ya pei gari nung ajentsü merangba mapang asüba amai ajiteter, ta pai ashi.

Nisung pezü gari ka nung sür liasü aser parnok ya British nunger mesük, kechiaser parnok indang steering wheel ya achichilen lir, ta pai ashi. Nisung tenet parnok indang gari tem yutsür tetsüng agi lenmang ka nung ajentsü merangdang asüba amai ngutet, koba evacuation plan nung meliasü.

“Timtem ya tulu liasü. Yimya ajak agi asürtem ya timba mesüra ajak amai bendanger ama sayur,” ta Sanz-i ashi.

Iba tatalokba tensa ya kidanger Portugal linük nung June 2017 nung atalokba den mesükteper, kong heatwave mapang morok-mi tuluka adoka nisung 60 dak tema asü aser timba yiru, aser asürtem ya tesadang ka pei gari nung mener ajentsü merangba mapang rongsetba liasü.

Sanz-i nüburtem dang ketdangsür temi totuyuba agütsüba sülen anidaktsü ayongzük aser ketdangsür temi takum kumzükba nung rangloker asünung iba ama lendong aketba mera magitsü ashi. Ano nisung pezü kanga sashia ronger mozüki nung anepaluba mapang lir.

Andalusia indang regional sorkar tekolakba Juan Manuel Moreno-i ano nisung 19 samar bushiba mapang lir ta Cadena Ser radio dang ashi.

Power cable ka süngolio takong nung tsüka mi ya tenzük südi ta bilemer, ta anasa aliba Antas jila indang mayor Pedro Ridao-i ashi.

“Nikongdang mopung ona liasü, aser ibaji ajanga mi ya jangroyonga ao. Ammang arudang onoki mi jangrua farmhouses, holiday homes aser gari tem arong, anungji onoki remseptsü tenzük,” ta Ridao-i ashi.

Iba tesem nungya longren aika lir, anungji emergency services agütsütsü asaker, ta pai ashi.

Spain Ato Kilonser Pedro Sanchez-i X post ka nung, iba morok-mi ajanga takoksa agütsüba asoshi kanga jashir aser aoksar ta ashi aser asür kinungertem den asükhu lemsatepa liasü.

May aser June ita Europe anüolen heatwaves ajanga tesem aika nung ali takong kumdaktsü, anungji taküm morok-mi adoktsü kanga mela kumdaktsür lir.

Tang asüba ya Spain morok-mi lendong nung 2005 küm sülen tang timba alitsü. Iba küm Guadalajara province nung barbecue ka nungi mi adoka firefighter 11 asü.