Spain nung lendong agütsür khasetogo: Police

Barcelona, August 18 (Agencies): Barcelona nung gari agi nisung 13 tsükseta aika yirutsür ghonda ishika tsüngta Cambrils jila nung kiralongra mapa inyaka gari agi nisung tsüksettsü merangba maparen nung temolung melemteter kiralongrar pongu khasetogo, ta Spain police temi ashi.
Item nisungtem ya Barcelona nung lendong agütsüba nung sendaktepa lir aser iba mapa ya Islamic State-i tenüng agiogo.
Brehostibarnü Barcelona nung aliba Las Ramblas nung nisung aika aliba tesemi gari anir aosang ya anu monguteti lir.
Iba lendong agütsüsang ya arishi küm 18 tain, Moussa Oubakir, ta Spain nung aliba media ajanga ashi.
Pa tenu ya Driss Oubakir lir aser Driss indang documents amshia lendong agütsüba gari ya khen atema Moussa-i meshia amshi, ta ashir.
Spain Ato Kelonser, Mariano Rajoy-i iba lendong ya aitsü aser iba ya ‘jihadist attack’ lir, ta ashi. Linük nung anogo asem mangyimtsü asoshi pai metetdaktsü aser Hokulbarnü teroto (10:00 GMT) nung asür nem akhüm agütsü.
Hokulbar anepdang yakda gari kait nisung aiak aliba tesem nung menünga aodang police ketdangser ka densema nisung 7 yiru, ta Catalan emergency service ajanga ashi. Yirur alirtem rungnungi nisung ka mozüki nung asü.
Lendong agütsüsang gari ya meküpok aser iba gari anisang temai adokdang police temi khaset, ta osang ajanga ashi. Iba nisungba ya kotari ka ama liasü, ta kasa osang ajanga ashi.
Lendong agütsürtem ya temang nung bomb sendakloka liasü, ta police temi ashi saka iba sülen Catalan regional head, Carles Puigdemont ajanga ashiba agi, parnok temang nung aliba belt ya taila liasü.
Barcelona anülulen kilometre 110 orr tzüküm anasa aliba Cambrils nung tensa azüoktetogo, ta police ajanga ashi.
Taa agütsür amshiba van ka Brehostibarnü Las Ramblas yimdong nung anir arua raliwalir aser iba tesem nung alirtem dak atsük.
Tenük küli alirtemi ashiba agi, iba van ya nisungtem dak tenük yoker lenmang kelen nungi keleni oli aruli ta nisungtem dak atsük.
Iba van anisang ya lendong agütsüba sülen tetsüng agi jena ao aser pa ya police temi bushiba mapang lir.
Las Ramblas ya lenmang tesatem ka lir aser iba lenmang ya kilometre 1.2 talang lir. Iba lenmang ya Barcelona yimti nung aliba Palace de Catalunya (Catalonia Square) nungi tzüküm anasa aliba Christopher Columbus monument tashi oa lir.
Las Ramblas nung lendong agütsüba nung linük 24 nungi nisung kar asü aser kar yiru, ta Catalan sorkar ajanga ashi.
Iba lendong nung asürtem rongnung Spain nungi ka, Italy nungi ana aser Belgium nunger ka densema lir.
Iba lendong nung yirur alir ya France nunger 26 liasü aser parnok 11 bo kanga mejungi yirur lir, ta France indang foreign ministry ajanga ashi. Germany nunger 13 aser Ireland nungi arishi küm pongu tain ka tetsüng sükdang.
Yirur alirtem rongnungi Hong Kong, Taiwan aser Greece nungi lir aser iba kasa lendong nung asürtem ya Pakistan, Philippine, Venezuela, Australia, Romania, Peru, Dutch, Danish, Algeria aser China nungi lir, ta ketdangser osang ajanga ashi.