Speaker-i Lok Sabha ketdang mesüteter: L K Advani

New Delhi, December 07 (Agencies): Tan agi hopta asembuba Parliament senden nung rongrong adoka senden junga mekatetba mapang ka nung tanü Bodhbarnü BJP lenir tain, LK Advani-i, Speaker-ia aser Parliamentary Affairs Minister-ia Lok Sabbha senden ketdang mesüteter, ta aitsüogo.
Lok Sabha nung longkak maneni aita senden junga mekatetba atema Advani-i Parliamentary Affairs Minister, Ananth Kumar dang mepelaba o jembiba angashi.
Congress aser TMC züngsemtemi yimyim ayima longkak aitba ajanga senden minute 15 thinentsü lia Advani-i, “Speaker-ia mesüra Parliamentary Affairs Minister-ia senden ketdang mesüteter,” ta jembiba angashi.
“Ni Speaker dang, ‘nai senden ketdang mesüteter’ ta ashitsü. Ni ibaji yimjak nung ashitsü,” ta Advani-i Parliamentary Affairs Minister Kumar dang ashi.
Senden minute 15 thinendang arishi küm 89 lenir Advani-i Lok Sabha ketdangser ka dang, senden koba mapang tashi thinentsü? ta asüngdang.
Ketdangser jagi, 2:00 ako tashi thinentsü ta ashi; ibaji langzüa Advani-i, “Mapang telatet ka makai thinentsü masü no?” ta asüngdang.
Tamalena Lok Sabha senden junga mekatetba atema Advani-i Kumar dang mepelai jembia liasü.