Special Category agienba anema okadak ken o benoktsü : Gogoi

Guwahati, March 1 (Agencies) : Centre-i Special Category jenjang agienba atema par sorkari okadak ken o benoktsü tebilemba lir ta Mongulbarnü Assam Chief Minister, Tarun Gogoi-i metetdaktsü.
“Centre-i Assam nungi Special Category jenjang agienba atema ni okadak ken o benoknür. Onoki iba atema legal advisers den asüngdangyatsü aser telemtetba ka agitsü” ta paisa ashi.
“State sorkari Centre dang Assam nem Special Category jenjang tanaben agütsütsü atema takhangba agüja arur, saka parnoki mapa kecha meinyaker. Centre-i North East Industrial and Investment Promotion Policy (NEIIPP) kübok mapatong tasentem züngokba inyakyim anentsüogo. Item telemtetba ajanga ozü state timtemer” ta Gogoi-i metetdaktsü.
Assam aser tanga Special Category state temi mepishiaka tan Budget nung 2013-14 tashi amshiba original ration bener maru, ta paisa shisem.
14th Finance Commission-i Assam nem central taxes shilem sen crore 22,131 lemzüktsü aser tan Budget nung Centre-i sen crore 18,938 lemzüktsü. 2015-16 tsüngda Assam-i central taxes nungi shilem Rs 2,395 crore tajemba angu. Anungji küm ana nung onok Rs 5,588 crore akoksatsü, ta paisa ashi.
Budget nung Bodoland Territorial Area Districts nem sen crore 100 lemzüktsüba indang jembidang, Gogoi-i “Nia Bodoland Territorial Council nem iba dang nungjagi timba agütsür. Modi arudang pai BTC tanishir Hagrama Mohilary-i akhangba ama sen crore 1000 agütsütsü nangzük, saka tang pai sen crore 100 dang agütsür. Mohilary ashioktsüba atema pelar” ta ashi.
Taoba assembly elections nung Mohilary’er telok Bodoland People’s Front (BPF)-i Congress den yaritepa liasü. Parnoki BJP dang nungi special package sen crore 1000 angutsü nangzüktepba sülen taruba elections nung parnok BJP den yariteptsü atema tenangzüktep agi.
North East ajunga nung lenmang aser aputem yanglutsü atema sen crore 5,000 lemzüktsüba indang jembidang, “Union Road Transport Minister Nitin Gadkari-i taruba küm pungu tsüngda Northeast tesem nung sen crore 1,00,000 teyari agütsütsü ta nangzükbaji Centre-i kodaser tongteta inyaktsü?” ta Gogoi-i asüngdang.
Koch-Rajbongshi, Tai-Ahom, Chutia, Moran, Motak aser Tea tribes nem ST jenjang agütsütsü onük nung BJP-i yimten mapa inyaker. Mezüngbo parnoki ST jenjang agütsütsü ta mulunga agizük, tang parnoki inyakyim kar metongshitsü atema luden ka shimogo. Parnoki assembly elections matongdang Assamese nunger külakoktsütsü atema atsükshishi asayar, ta Gogoi-isa ashi.